បាត់ដំបង-សិរីសោភ័ណ៖ សម្តេចតេជោ ហ៊ុន សែន អញ្ជើញសម្ពោធដាក់ឱ្យប្រើប្រាស់ កំណាត់ផ្លូវជាតិលេខ៥ ភាគខាងជើង បាត់ដំបង-សិរីសោភ័ណ ប្រវែងសរុប ៨៤.៧៤គីឡូម៉ែត្រ នាព្រឹកថ្ងៃទី១០ ខែមករា ឆ្នាំ២០២២។ កំណាត់ផ្លូវនេះ បានបើកការដ្ឋានសាងសង់ក្រោមអធិបតីភាពរបស់សម្តេចតេជោ នាយករដ្ឋមន្រ្តី កាលពីថ្ងៃទី២៦ ខែមីនា ឆ្នាំ២០១៨ ប្រើប្រាស់រយៈពេលសាងសង់ចំនួន ៥៥ខែ និងបានបញ្ចប់ជាស្ថាពរនៅក្នុងខែកញ្ញា ឆ្នាំ២០២១ ចំណាយថវិកាសរុបប្រមាណ ១៦៥.៧៨លានដុល្លារ ក្រោមឥណទានសម្បទានពីរដ្ឋាភិបាលជប៉ុន រួមជាមួយនឹងថវិកាបដិភាគរបស់ រាជរដ្ឋាភិបាល សម្រាប់ការងារដោះស្រាយផលប៉ះពាល់ បោសសម្អាតគ្រាប់មីន និងយុទ្ធភ័ណ្ឌមិនទាន់ផ្ទុះផងដែរ។
កំណាត់ផ្លូវនេះ មានប្រវែងសរុប ៨៤.៧៤គីឡូម៉ែត្រ ជាប្រភេទផ្លូវចាក់បេតុងកៅស៊ូ(AC) កម្រាស់ ១៥សង់ទីម៉ែត្រ ក្នុងនោះរួមមាន៖ ការងារពង្រីកទំហំផ្លូវមេដែលមានស្រាប់ប្រវែង ៥១,៤៨គីឡូម៉ែត្រ ទទឹងមានប្រវែង ២៣ម៉ែត្រ មាន ៤គន្លង (គន្លងនីមួយៗ មានទទឹង ៣,៥០ម៉ែត្រ និងមាន ២គន្លងទៅ និង ២គន្លងមក) ចិញ្ចើមផ្លូវមានទទឹង ៣ម៉ែត្រ (សងខាង) និងសួនទ្រូងផ្លូវខណ្ឌចែកទិសដៅចរាចរណ៍នៅចំកណ្តាល មានទទឹង ៣ម៉ែត្រ មានផ្លូវវាងក្រុង ២ខ្សែ ប្រវែងសរុប ៣៣.២៦គីឡូម៉ែត្រ (ផ្លូវវាងក្រុងបាត់ដំបង ប្រវែង ២៣.៩២គីឡូម៉ែត្រ និងផ្លូវវាងក្រុងសិរីសោភ័ណប្រវែង ៩.៣៤គីឡូម៉ែត្រ) ក្នុងនោះសាងសង់ស្ពានថ្មីចំនួន ២កន្លែង (លើផ្លូវវាង) ពង្រីកនិងជួសជុលស្ពានដែលមានស្រាប់ចំនួន១០កន្លែង (លើផ្លូវមេ)។
ការសាងសង់កំណាត់ផ្លូវនេះ រួមមានការងារដាក់លូប្រអប់ចំនួន ៧៦កន្លែង និងលូមូលតាមបណ្តោយផ្លូវ ចំនួន ១១៣កន្លែង ព្រមទាំងបំពាក់ភ្លើងបំភ្លឺ LED នៅតាមផ្លូវប្រសព្វ និងត្រូវបានបែងចែកកិច្ចសន្យា សាងសង់ជា ២កញ្ចប់ រួមមាន៖ កញ្ចប់កិច្ចសន្យាទី១៖ សាងសង់ដោយសម្ព័ន្ធ ក្រុមហ៊ុន Teken-Taiyo Joint Venture មានប្រវែងសរុប ៤៦.២៧គីឡូម៉ែត្រ រួមមានការពង្រីកផ្លូវមេប្រវែង ២២.៣៥គីឡូម៉ែត្រ និងការសាងសង់ផ្លូវវាងក្រុងបាត់ដំបងប្រវែង ២៣.៩២គីឡូម៉ែត្រ។ កញ្ចប់កិច្ចសន្យា ទី២៖ សាងសង់ដោយសម្ព័ន្ធក្រុមហ៊ុន Daiho-Asanuma Joint Venture មានប្រវែងសរុប ៣៨.៤៧គីឡូម៉ែត្រ រួមមាន ការពង្រីកផ្លូវមេប្រវែង ២៩.១៣គីឡូម៉ែត្រ និងសាងសង់ផ្លូវវាង ក្រុងសិរីសោភ័ណ ប្រវែង ៩.៣៤គីឡូម៉ែត្រ ត្រួតពិនិត្យបច្ចេកទេសដោយសម្ព័ន្ធក្រុមហ៊ុន KEI-OCC Katahira & Engineers International-Oriental Consultants Company Limited Joint Venture។
សូមបញ្ជាក់ថា គម្រោងធ្វើឱ្យប្រសើរឡើងវិញផ្លូវជាតិលេខ៥ មានប្រវែងសរុប ៣៦៦គីឡូម៉ែត្រ ចាប់ផ្តើមពីព្រែកក្តាម រហូតដល់ក្រុងប៉ោយប៉ែត ខេត្តបន្ទាយមានជ័យ គ្រោងប្រើប្រាស់ថវិកាប្រមាណ ៥០០លានដុល្លារ បែងចែកចេញជា ៣កំណាត់ រួមមាន៖ កំណាត់ទី១៖ ភាគខាងជើង (បាត់ដំបង-សិរីសោភ័ណ) មានប្រវែង ៨៤.៧៤គីឡូម៉ែត្រ បានបញ្ចប់ការងារសាងសង់ជាស្ថាពរ ១០០%។ កំណាត់ទី២៖ ភាគខាងត្បូង (ព្រែកក្តាម-ធ្លាម្អម) មានប្រវែង ១៣៥.២៥គីឡូម៉ែត្រ សម្រេចបាន ប្រមាណ៦៤% គ្រោងនឹងបញ្ចប់នៅពាក់កណ្តាលឆ្នាំ២០២២។ កំណាត់ទី៣៖ ភាគកណ្តាល (ធ្លាម្អម-បាត់ដំបង និងសិរីសោភ័ណ-ប៉ោយប៉ែត) មានប្រវែង ១៤៦.០៤គីឡូម៉ែត្រ ដែលកំណាត់ធ្លាម្អម-បាត់ដំបង សម្រេចបានប្រមាណ៥៥% និងកំណាត់សិរីសោភ័ណ-ប៉ោយប៉ែត កំពុងរៀបចំនីតិវិធីដេញថ្លៃជ្រើសរើស ក្រុមហ៊ុនសាងសង់។
នៅក្នុងពិធីខាងលើ លោក ស៊ុន ចាន់ថុល បានគូសបញ្ជាក់អំពីសក្តានុពលនៃផ្លូវជាតិលេខ៥ ក្នុងការតភ្ជាប់ ទំនាក់ទំនងរូបវន្ត ស្ថាប័ន និងប្រជាជននៃខេត្តបាត់ដំបង ខេត្តបន្ទាយមានជ័យ និងបណ្តាខេត្តជាប់ព្រំ ប្រទល់គ្នា និងជាខ្សែផ្លូវយុទ្ធសាស្រ្តយ៉ាងសំខាន់តភ្ជាប់ពីរាជធានីភ្នំពេញ ទៅច្រកទ្វារព្រំដែនប៉ោយប៉ែត-អារញ្ញប្រាថេត (ព្រំដែនកម្ពុជា-ថៃ) ជាផ្នែកមួយនៃផ្លូវអាស៊ានហាយវ៉េលេខ១ (AH1) តភ្ជាប់គ្នារវាង រាជធានីភ្នំពេញ ទីក្រុងបាងកក និងទីក្រុងហូជីមិញ និងជាខ្សែផ្លូវស្ថិតក្នុងរបៀងសេដ្ឋកិច្ចខាងត្បូងដ៏មាន សក្តានុពល និងការប្រកួតប្រជែងខ្លាំងសម្រាប់វិស័យទេសចរណ៍ ពាណិជ្ជកម្ម វិនិយោគ ភស្តុភារកម្ម និងសេដ្ឋកិច្ចរបស់អាស៊ាន ក៏ដូចជាមហាអនុតំបន់មេគង្គ(GMS)ផងដែរ។
លោក រដ្ឋមន្រ្តីបានថ្លែងបន្តថា ទោះបីកម្ពុជាបានប្រឈមនឹងវិបត្តិកូវីដ-១៩ ក៏ដោយ រាជរដ្ឋាភិបាលកម្ពុជា នៅតែចាត់ទុកការអភិវឌ្ឍហេដ្ឋារចនាសម្ព័ន្ធ គឺជាវិស័យអាទិភាពនៅក្នុងចំណោមវិស័យអាទិភាពសំខាន់ៗ រួមមាន៖ ផ្លូវ ទឹក ភ្លើង និងមនុស្ស។ ក្នុងនោះ គម្រោងហេដ្ឋារចនាសម្ព័ន្ធផ្លូវ និង ស្ពានជាច្រើន បានបញ្ចប់ការសាងសង់ជាស្ថាពរ គម្រោងសំខាន់ៗមួយចំនួនផ្សេងទៀត បាន និងកំពុងបន្តការសាងសង់ និងបានត្រៀមអនុវត្តគម្រោងថ្មីៗជាច្រើនទៀតនាពេលខាងមុខនេះ ដោយប្រើប្រាស់ ប្រភពថវិកាសន្សំរបស់ជាតិ និងហិរញ្ញប្បទានពីដៃគូអភិវឌ្ឍន៍ រួមទាំងជំនួយឥតសំណង និងជំនួយបច្ចេក ទេសពីបណ្ដាប្រទេសជាមិត្ត រួមមាន៖ ចិន ជប៉ុន កូរ៉េខាងត្បូង និងដៃគូអភិវឌ្ឍន៍នានាដូចជា៖ ធនាគារអភិវឌ្ឍន៍អាស៊ី និងធនាគារពិភពលោកជាដើម។
សម្តេចតេជោ ហ៊ុន សែន បានវាយតម្លៃខ្ពស់ ព្រមជាមួយនឹងការដឹងគុណដ៏ជ្រាលជ្រៅចំពោះប្រជាជននិងរដ្ឋាភិបាល នៃប្រទេសជប៉ុន ដែលបានជួយដល់ប្រជាពលរដ្ឋកម្ពុជាលើគ្រប់វិស័យនៅគ្រប់កាលៈទេសៈទាំងអស់ និង មិនមានលក្ខខណ្ឌស្មុគស្មាញ ដោយបានផ្តល់នូវជំនួយឥតសំណង និងឥណទានសម្បទានដ៏ច្រើន សន្ធឹកសន្ធាប់សម្រាប់ជួយកសាង និងអភិវឌ្ឍហេដ្ឋារចនាសម្ព័ន្ធរូបវន្តនៅកម្ពុជា និងបានជូនពរសូមឱ្យ ចំណងមិត្តភាពជប៉ុន-កម្ពុជាកាន់តែមានភាពរឹងមាំ និងបន្តឋិតថេរចីរកាលតរៀងទៅ៕
ដោយ៖ មឿន ឌីណា (Moeun Dyna)
