ភ្នំពេញ៖ គិតត្រឹមដំណាច់ខែតុលា ក្រុមប្រឹក្សាអភិវឌ្ឍកម្ពុជា បានចុះបញ្ជីឱ្យក្រុមហ៊ុនជប៉ុន ១៤៦គម្រោង ទុនវិនិយោគសរុប ២.៨៥៣លានដុល្លារ ក្នុងនោះមានគម្រោងវិនិយោគនៅក្នុងតំបន់សេដ្ឋកិច្ចពិសេស ទុនវិនិយោគសរុបប្រមាណ ៣៤០លានដុល្លារ។ បើតាមសេចក្ដីប្រកាសព័ត៌មាន ក្រុមប្រឹក្សាអភិវឌ្ឍកម្ពុជា។

ក្រុមប្រឹក្សាអភិវឌ្ឍកម្ពុជា បានបន្តថា តួលេខខាងលើត្រូវបានប្រកាសនៅក្នុងវេទិកាផ្សព្វផ្សាយច្បាប់វិនិយោគថ្មីនៃកម្ពុជា ទៅកាន់វិនិយោគិនជប៉ុន ប្រព័ន្ធវីដេអូ កាលពីថ្ងៃទី១១ ខែវិច្ឆិកា ឆ្នាំ២០២១។

លោក សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានថ្លែងបញ្ជាក់នៅក្នុងវេទិកានោះថា ច្បាប់ស្ដីពីវិនិយោគថ្មីនេះសម្រាប់លើកកម្ពស់ភាពទាក់ទាញ បង្កើតភាពក្រកួតប្រជែងខ្ពស់ និងបង្កើតរបបលើកទឹកចិត្តបើកចំហ និងមានតម្លាភាពជូនវិនិយោគិនទាំងអស់ ព្រមទាំងផ្ដល់នូវការធានានិងការពារវិនិយោគដោយគ្មានគោលការណ៍រើសអើង។

លោក ម៉ាសាហ៊ីរ៉ូ មីខាមី ឯកអគ្គរដ្ឋទូតជប៉ុនប្រចាំកម្ពុជា បានថ្លែងដោយរំលេចអំពីសារៈសំខាន់នៃច្បាប់ស្ដីពីវិនយោគថ្មីនេះ នឹងដើរតួនាទីជាត្រីវិស័យ និងមូលដ្ឋានច្បាប់ដ៏រឹងមាំសម្រាប់វិនិយោគិន ដើម្បីរួមចំណែកលើកកម្ពស់អភិវឌ្ឍសេដ្ឋកិច្ច-សង្គម និងស្របពេលដែលកម្ពុជាកំពុងស្ដារសេដ្ឋកិច្ចឡើងវិញបន្ទាប់ពីការរាតត្បាតនៃជំងឺកូវីដ-១៩។

លោក ទូត បានថ្លែងនូវការគាំទ្រយ៉ាងពេញទំហឹងក្នុងការផ្សព្វផ្សាយ និងលើកកម្ពស់ការយល់ដឹងពីច្បាប់ស្ដីពីវិនិយោគនៃកម្ពុជាទៅកាន់សហគមន៍ធុរកិច្ច ដែលប្រការនេះជាការបន្ស៊ីគ្នាទៅនឹងការអនុវត្តយុទ្ធសាស្រ្តការទូតសេដ្ឋកិច្ចកម្ពុជាឆ្នាំ២០២១-២០២៣។

នៅក្នុងវិទិកានោះ លោក ម៉ាសាហ៊ីរ៉ូ មីខាមី បានបង្ហាញនូវជំនឿយ៉ាងមុតមាំថាការប្រកាសឱ្យប្រើច្បាប់នេះ នឹងជាយុទ្ធសាស្រ្តមួយដ៏មានប្រសិទ្ធិភាព  និងទាន់ពេលវេលាក្នុងការស្ដារឡើងវិញនូវសេដ្ឋកិច្ច-សង្កមក្រោយវិបត្តិនៃជំងឺកូវីដ-១៩ ព្រមទាំងធ្វើឱ្យកម្ពុជាក្លាយជាទិសដៅដ៏ទាក់ទាញ និងប្រកួតប្រជែងខ្ពស់មួយនៅក្នុងតំបន់សម្រាប់ការវិនិយោគប្រកបដោយគុណបភាព និងចីរភាព។ លោក បានបញ្ជាក់នូវការរូលរួមជាមួយរាជរដ្ឋាភិបាលកម្ពុជាក្នុងកិច្ចជំរុញ និងទាក់ទាញវិនិយោគផ្ទាល់ពីជប៉ុនមកកម្ពុជា ដើម្បីឆ្ពោះទៅរកវឌ្ឍនភាព និងវិបុលភាពសេដ្ឋកិច្ចនៃប្រទេសទាំងពីរ។

នៅក្នុងវិទិកាដដែលនោះ សុខ ចិន្តាសោភា បានថ្លែងអំណរគុណដល់ការចូលរួមយ៉ាងសកម្មពីសហគមន៍ធុរកិច្ចជប៉ុននៅកម្ពុជា តាមរយៈអង្គការពាណិជ្ជកម្មក្រៅប្រទេសជប៉ុន និងធនាគារមីហ្ស៊ូហូ និងតួអង្គពាក់ព័ន្ធដទៃទៀត ដែលបានបង្ហាញពីការយកចិត្តទុកដាក់ដល់ច្បាប់នេះ និងជួយជ្រោមជ្រែងការផ្សព្វផ្សាយច្បាប់នេះឱ្យបានទូលំទូលាយ។

រដ្ឋមន្រ្តីប្រតិភូអមនាយករដ្ឋមន្រ្តី បានវាយតម្លៃខ្ពស់ចំពោះសកម្មភាពវិនិយោគរបស់អ្នកវិនិយោគជប៉ុនទាំងអស់ ជាពិសេសការវិនិយោគក្នុងវិស័យកម្មសាលមិនមែនវាយនភណ្ឌ ដែលបាននិងកំពុងដើរតួនាទីយ៉ាងសំខាន់ក្នុងការរួមរួមចំណែកដល់ការធ្វើពិធកម្មមូលដ្ឋានសេដ្ឋកិច្ចកម្ពុជា និងការអភិវឌ្ឍធនធានមនុស្ស។

គួរបញ្ជាក់ថា នៅក្នុងឆមាសទី១ ឆ្នាំ២០២១ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគថ្មី និងគម្រោងពង្រីកផលិតកម្មសរុប ៨៧គម្រោង ឬស្មើនឹងទុនវិនិយោគចំនួនជិត ៣ពាន់លានដុល្លារ ដែលកើនប្រមាណ ១០% បើធៀបនឹងពេលដូចគ្នាឆ្នាំមុន៕

ដោយ៖ មឿន ឌីណា (Moeun Dyna)