កណ្ដាល៖ ផ្លូវ១ខ្សែ ប្រវែងជាង ១០គីឡូម៉ែត្រ ទទឹង ៦០ម៉ែត្រ ចេញពីព្រលានយន្តហោះអន្តរជាតិភ្នំពេញថ្មី កំពុងស្ថាបនា មកកាន់រាជធានីភ្នំពេញ។ បើតាមការថ្លែងឱ្យដឹងពី លោក នូវ ប៉េងច័ន្ទតារា អភិបាលរងខេត្ត និងជាអ្នកនាំពាក្យរដ្ឋបាលខេត្តកណ្តាល។
ផ្លូវ១ខ្សែនេះសំខាន់ណាស់ ហើយក៏ជាខ្សែផ្លូវមេក្នុងគម្រោងអភិវឌ្ឍប្រព័ន្ធដឹកជញ្ជូន របស់គម្រោងព្រលានយន្តហោះភ្នំពេញថ្មី ដែលគ្រោងដាក់ឱ្យដំណើរការនៅឆ្នាំ២០២៣។ បើតាមការថ្លែងបន្តរបស់ លោក នូវ ប៉េងច័ន្ទតារា មិនបានបញ្ជាក់ពីតម្លៃកញ្ចប់ស្ថាបនា ផ្លូវថ្មីមួយខ្សែនេះ ពីព្រោះជាគម្រោងរបស់ព្រលានយន្តហោះអន្តរជាតិភ្នំពេញ ដែលវិនិយោគដោយក្រុមហ៊ុន OCIC។
ដំបូងឡើយ អ្នកឧកញ៉ាពុង ឃាវសែ បានប្រកាសពីការសាងសង់ស្ពានអាកាសប្រវែងជាង ១០គីឡូម៉ែត្រ ពីព្រលានយន្តហោះថ្មី មកកាន់រាជធានីភ្នំពេញ ប៉ុន្តែតើគម្រោងនេះផ្លាស់ប្តូរមកសាងសង់ផ្លូវនេះវិញឬយ៉ាងណា យើងមិនអាចស្វែងរកការពន្យល់ពីថ្នាក់ដឹកនាំក្រុមហ៊ុននេះបាននៅឡើយទេ។
តាមផែនការរបស់រដ្ឋាភិបាល និងក្រុមហ៊ុន OCIC ប្តេជ្ញាឱ្យគម្រោងព្រលានយន្តហោះថ្មីដាក់ឱ្យដំណើរការ ឆ្នាំ២០២៣។ ដូច្នេះហេដ្ឋារចនាសម្ព័ន្ធសំខាន់ណាស់។ ក្រៅពីផ្លូវអាទិភាពមួយខ្សែដែលកំពុងសាងសង់ ក៏នឹងមានការស្ថាបនាផ្លូវជាច្រើនខ្សែទៀតប្រ ទាក់ក្រឡាគ្នា ដែលនឹងចាយថវិការាប់លានដុល្លារទៀត ក្នុងការសាងសង់នាពេលខាងមុខនេះ៕
ប្រភព៖ propertyarea.asia
ដោយ៖ មឿន ឌីណា (Moeun Dyna)
