កំពត៖ លោក ជាវតាយ អភិបាលខេត្តកំពត ក្រោយពីបានដឹកនាំមន្រ្តីក្រោមឱវាទ និងមន្រ្តីជំនាញពាក់ព័ន្ធចុះពិនិត្យមើលទីតាំងដែលវិនិយោគិន ស្នើសុំវិនិយោគ និងអភិវឌ្ឍន៍ឆ្នេរព្រែកកំពង់បាយ ចាប់ពីខាងត្បូងកីឡាលើទឹក រហូតដល់ខាងត្បូងរូបសំណាកព្រះអង្គឌួង សរុបប្រវែងប្រហែលជិត ៣០០ម៉ែត្រ ស្ថិតក្នុងសង្កាត់កំពង់កណ្តាល ក្រុងកំពត ខេត្តកំពត សូមឱ្យម្ចាស់គម្រោង ផ្ដល់នូវភាពចំណេញដល់ប្រពលរដ្ឋ ក៏ដូចជាខេត្តផងដែរ។ បើតាមរដ្ឋបាលខេត្តកំពត។
ការចុះពិនិត្យទីតាំងខាងលើ ធ្វើឡើងកាលពីថ្ងៃទី២០ ខែកញ្ញា ឆ្នាំ២០២១ លោក ជាវ តាយ អភិបាលខេត្តកំពត បានថ្លែងបញ្ជាក់ «ក្នុងនាមរដ្ឋបាលខេត្តសូមស្វាគមន៍នូវរាល់ការវិនិយោគ ដែលធ្វើការអភិវឌ្ឍខេត្ត ហើយលោកតែងតែលើកទឹកចិត្ត គាំទ្ររាល់ការវិនិយោគ ដែលចំណេញដល់ប្រជាពលរដ្ឋ ក៏ដូចជាខេត្តផងដែរ»។
លោក បានថ្លែងបន្តថា ជាក់ស្ដែងការចុះមកពិនិត្យដល់ ទីតាំងគម្រោងនេះ គឺក្នុងគោលបំណងដើម្បី សិក្សា និងទាមទារឱ្យមានការចូលរួមមតិយោបល់ពីជំនាញ និងអាជ្ញាធរពាក់ព័ន្ធសំដៅធ្វើយ៉ាងណាឱ្យដំណើរការអភិវឌ្ឍ ប្រកបដោយគុណភាព និរន្តរភាពបញ្ចៀសបាននូវផលប៉ះពាល់ឱ្យនៅមានកម្រិតតិចបំផុត និងបម្រើដល់ផលប្រយោជន៍សាធារណជនឱ្យបានច្រើន។
«មុននឹងឈានទៅសម្រេចយល់ព្រមលើគម្រោងវិនិយោគ អ្នកវិនិយោគត្រូវរៀបចំគម្រោងប្លង់មេដាក់មករដ្ឋបាលខេត្ត ដើម្បីខេត្តប្រជុំពិភាក្សាឈានទៅចុះហត្ថលេខាអនុញ្ញាតជូន»។ បើតាមការបញ្ជាក់បន្តរបស់ អភិបាលខេត្តកំពត លោក ជាវតាយ បានបន្តទៀតថា សង្ឃឹមថាខេត្តកំពត ពិសេសទីក្រុងកំពត នៅពេលខាងមុខ ក្រោយពីបង្កើតបាននូវគម្រោងថ្មីមួយនេះបន្ថែមទៀត នឹងអាចមាននូវហេដ្ឋារចនាសម្ព័ន្ធបម្រើក្នុងវិស័យទេសចរណ៍ និងបង្កើតបានភាពទាក់ទាញព្រមទាំងអាជីវកម្មការងាររួមនឹងការលើកកម្ពស់ជីវភាពប្រជាពលរដ្ឋបានកាន់តែប្រសើរឡើងមួយកម្រិតទៀត៕
ដោយ៖ មឿន ឌីណា (Moeun Dyna)
