ឧត្តរមានជ័យ៖ រោងចក្រផលិតអគ្គិសនីពីការដុតធ្យូងថ្មកម្លាំង ២៦៥មេហ្គាវ៉ាត់ របស់ក្រុមហ៊ុន Han Seng Coal Mine Co Ltd (HSCMC) ស្ថិតនៅនៅក្នុងស្រុកត្រពាំងប្រាសាទ ខេត្តឧត្តរមានជ័យ នឹងដាក់ឱ្យដំណើរការ នៅឆ្នាំ២០២១នេះ ទុនវិនិយោគប្រមាណ ២៩៤,៣លានដុល្លារ។
តាមផែនការរោងចក្រនេះ នឹងចាប់ផ្តើមដំណើរការនៅចុងឆ្នាំ២០២១ ឬដើមឆ្នាំ២០២២ ដោយប្រើរ៉ែធ្យូងថ្ម ដែលមាននៅក្នុងស្រុកត្រពាំងប្រាសាទ ខេត្តឧត្តរមានជ័យ។ បើតាមាករថ្លែងឱ្យដឹងពី លោក ឌី រ៉ាដូ អភិបាលរងខេត្តឧត្តរមានជ័យ បានបន្តថា ការសាងសង់រោងចក្រផលិតអគ្គិសនីពីធ្យូងថ្មកម្លាំង ២៦៥មេហ្គាវ៉ាត់ កំពុងមានដំណើរការទៅមុខជាប្រចាំ ការសាងសង់ហេដ្ឋារចនាសម្ព័ន្ធជិតបញ្ចប់អស់ហើយ ដោយនៅរង់ចាំតែការយកម៉ាស៊ីនមកដំឡើងប៉ុណ្ណោះ។
លោក អភិបាលរងខេត្តរូនេះ បានថ្លែងប្រាប់គេហទំព័រអចលនទ្រព្យអាស៊ីកាលពីថ្មីៗនេះថា បើតាមទិដ្ឋភាពការងារ គឺរោងចក្រនេះនឹងអាចចាប់ដំណើរការតាមការកំណត់របស់រដ្ឋាភិបាល នៅចុងឆ្នាំនេះក្រុមហ៊ុនធ្វើតេស្តសាកល្បងម៉ាស៊ីន ហើយនៅដើមឆ្នាំ២០២២ ចាប់ផ្តើមដំណើរការជាផ្លូវការតែម្ដង។
លោក បានថ្លែងបន្តថាក្រុមហ៊ុនខាងលើ រដ្ឋាភិបាលបានអនុម័តឱ្យវិនិយោគ បង្កើតរោងចក្រអគ្គិសនីពីការដុតធ្យូងថ្មកម្លាំង ២៦៥មេហ្គាវ៉ាត់ ក្នុងខេត្តឧត្តរមានជ័យ កាលពីខែកុម្ភៈ ឆ្នាំនេះ។
បច្ចុប្បន្ន ប្រទេសកម្ពុជា អាចផលិតថាមពលអគ្គិសនីបានពី ៧០ ទៅ៨០ភាគរយ នៃតម្រូវការប្រើប្រាស់ក្នុងស្រុកសរុប ខណៈសល់ពីនោះបានមកពីការនាំចូលពីប្រទេសជិតខាង។ បើតាមការថ្លែងរបស់ អ្នកនាំពាក្យក្រសួងរ៉ែ និងថាមពល លោក វិចទ័រ ហ្សូនា បានបញ្ជាក់ថា ការបង្កើនការផ្គត់ផ្គង់ថាមពល ជាគោលការណ៍នៃការអភិវឌ្ឍវិស័យឧស្សាហកម្ម កសិកម្ម និងវិស័យផ្សេងៗទៀតដែលជាស្នូល និងមូលដ្ឋានគ្រឹះក្នុងការបង្កើតការងារសម្រាប់ប្រជាជនខ្មែរ៕
ដោយ៖ Moeun Dyna
