ព្រះវិហារ៖ «ភ្នំត្បែង» នៅខេត្តព្រះសវិហារ ត្រូវបានអ្នកជំនាញឯកភាពរៀបចំដាក់ក្នុងបញ្ជីត្រៀម ដើម្បីស្នើសុំបញ្ចូលជាបេតិកភណ្ឌធម្មជាតិពិភពលោករបស់អង្គការយូណេ (UNESCO)។ បើយោងតាម លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន។
លោក នេត្រ ភក្រ្តា នាឱកាសចុះពិនិត្យទីតាំងខាងលើរយៈពេល ៣ថ្ងៃ ពីថ្ងៃទី២៩ ដល់៣១ ខែមករា ឆ្នាំ២០២១ បានបញ្ជាក់ការដាក់ចូលនេះ «ព្រោះមានសក្តានុពលសំខាន់ចំនួន៣ គឺ ទីសក្ការៈបូជា សម្បូណ៌ដោយជីវៈចម្រុះ និងទេសចរណ៍ធម្មជាតិ»។
សូមបញ្ជាក់ថា តំបន់បេតិកភណ្ឌធម្មជាតិភ្នំត្បែងមានជ័យ បានបង្កើតឡើងកាលពីថ្ងៃទី១៣ ខែកញ្ញា ឆ្នាំ២០១៦។ គ្របដណ្ដប់លើផ្ទៃដីប្រមាណ ២,៥ម៉ឺនហិកតា ដែលស្ថិតនៅជាប់ស្រុកចំនួនក្នុងខេត្តព្រះវិហារ រួមមាន ស្រុកសង្គមថ្មី ស្រុករវៀង ស្រុកគូលែន និងក្រុងព្រះវិហារ។
មុននឹងឡើងដល់កំពូលភ្នំនេះ អ្នកទេសចរ ត្រូវធ្វើដំណើរតាមជម្រាលភ្នំ ដែលអមទៅដោយទេសភាពដំណាំចម្ការរបស់ប្រជាជនដាច់កន្ទុយភ្នែក ហើយអ្វីដែលសំខាន់នោះ គឺត្រូវឡើងភ្នំដែលមានកម្ពស់ជាង ៤០០ម៉ែត្រ និងមានកាំជណ្តើរ ១៨០០កាំ។
តំបន់នេះ ក៏មានទឹកជ្រោះធម្មជាតិដ៏ស្រស់ស្អាតជាច្រើនកន្លែង ដែលមានសក្តានុពលសម្រាប់ ការអភិវឌ្ឍន៍ទេសចរណ៍ធម្មជាតិនៅថ្ងៃអនាគតផងដែរ។ ទឹកធ្លាក់ភ្នំត្បែង ឬទឹកធ្លាក់តាម៉ាភ្នំត្បែង កម្ពស់ប្រមាណជិត ៣០ម៉ែត្រ។
ទឹកធ្លាក់ភ្នំត្បែង ស្ថិតនៅលើកំពូលភ្នំត្បែងមានជ័យភាគខាងជើងក្រុងភ្នំពេញ ចម្ងាយប្រមាណ ៣៥គីឡូម៉ែត្រ ពីក្រុងព្រះវិហារ ភ្ញៀវទេសចរត្រូវដើរឡើងជណ្ដើរបេតុង ១ ៣៤៥កាំ ដោយឆ្លងកាត់អារាមភ្នំត្បែង ឬវត្ដដំបូកខ្មៅ ប្រមាណ ១ គីឡូម៉ែត្រ។ ជណ្ដើរបេតុងលាតពង្រាយតាមជម្រាលភ្នំកម្ពស់ ៦០០ម៉ែត្រ។
ទឹកធ្លាក់ភ្នំត្បែង ឬតាម៉ា ស្ថិតក្នុងភូមិបេងកោង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារចម្ងាយប្រមាណ ២៨០ គីឡូម៉ែត្រពីភ្នំពេញ ដោយធ្វើដំណើរតាមផ្លូវជាតិលេខ ៦២ ឬ ១០០គីឡូម៉ែត្រ ពីផ្លូវបំបែកសៀមរាប ត្រង់ឃុំត្រពាំងឫស្សីនៃខេត្ដកំពង់ធំ៕
ដោយ៖ Moeun Dyna
