ភ្នំពេញ៖ រដ្ឋាភិបាលកូរ៉េ តាមរយៈទីភ្នាក់ងារសហប្រតិបត្ដិការអន្ដរជាតិកូរ៉េ (KOICA) ប្រចាំកម្ពុជា បានផ្ដល់ហិរញ្ញប្បទានឥតសំណងចំនួន ៨០លានដុល្លារ មកកម្ពុជា ដែលកំពុងអនុវត្តគម្រោងចំនួន ១២។ បើតាមសេចក្ដីជូនព័ត៌មានរបស់ ក្រុមប្រឹក្សាអភិវឌ្ឍន៍កម្ពុជា (CDC) ថ្ងៃទី២១ ខែតុលា នេះ។
ក្រុមប្រឹក្សាអភិវឌ្ឍន៍កម្ពុជា បានបន្តថា ការផ្ដល់ហិរញ្ញប្បទានខាងលើ នៅក្នុងជំនួបកិច្ចពិភាក្សារវាង លោក ឈៀង យ៉ាណារ៉ា រដ្ឋមន្រ្តីប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា ជាមួយលោក នោ ហ្យន់ជូន (RHO Hyunjun) ប្រធានតំណាងនៃទីភ្នាក់ងារសហប្រតិបត្ដិការអន្ដរជាតិកូរ៉េ (KOICA) ប្រចាំកម្ពុជា កាលពីថ្ងៃទី២១ ខែតុលា ឆ្នាំ២០២០។
នៅក្នុងជំនួបខាងលើ លោក លោក ឈៀង យ៉ាណារ៉ា បានវាយតម្លៃខ្ពស់ចំពោះការគាំទ្ររបស់រដ្ឋាភិបាលកូរ៉េ នាពេលកន្លងមក ដែលបានរួមចំណែកដល់ការអភិវឌ្ឍសង្គម-សេដ្ឋកិច្ចកម្ពុជា តាមរយៈអនុវត្តគម្រោង និងកម្មវិធីនានា។ លោក ថា បន្ថែមលើនេះ ក្នុងនាមរដ្ឋាភិបាល បានថ្លែងអំណរគុណយ៉ាងជ្រាលជ្រៅចំពោះ KOICA ដែលបានគាំទ្ររដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ-១៩ និងសម្របសម្រួលការស្តារសេដ្ឋកិច្ចឡើងវិញ។
នាឱកាសនោះ លោក នោ ហ្យន់ជូន លើកឡើងថា ជាស្ដែង KOICA កំពុងអនុវត្តគម្រោងចំនួន ១២ ដែលមានទឹកប្រាក់ប្រមាណ ៨០លានដុល្លារ និងគម្រោងអទិភាពមួយចំនួនទៀតសម្រាប់ឆ្នាំ២០២១ និង២០២២។ លោក ថា ការចូលរួមជាមួយរារដ្ឋាភិបាលក្នុងការទប់ស្កាត់ជំងឺនេះ បានផ្ដល់ជំនួយសង្គ្រោះបន្ទាន់ជាច្រើន និងហិរញ្ញប្បទានសម្រាប់ចូលរួមស្ដារ និងជំរុញសេដ្ឋកិច្ចកម្ពុជាផងដែរ។
គោលបំណងសំខាន់នៃកិច្ចប្រជុំនេះគឺ ដើម្បីពិភាក្សាអំពីដំណើរការសម្រាប់ការរៀបចំសកម្មភាពរបស់ KOICA ស្តីពី ការរាតត្បាតសកលរបស់ជំងឺកូវីដ-១៩ និងផែនការរបស់កយកាសម្រាប់ឆ្នាំ២០២១ ក៏ដូចជាគម្រោងថ្មីៗរបស់ KOICA សម្រាប់ប្រទេសកម្ពុជានៅឆ្នាំ២០២២ និងដើម្បីផ្លាស់ប្តូរទស្សនៈស្តីពីកិច្ចសហប្រតិបត្តិការអភិវឌ្ឍន៍ទ្វេភាគីនាពេលអនាគត។ បើតាមទំព័រហ្វេសប៊ុក KOICA CAMBODIA OFFICE។
KOICA បានឱ្យដឹងថា ចាប់តាំងពីឆ្នាំ១៩៩១-២០១៩ KOICA បានផ្តល់ហិរញ្ញប្បទានឥតសំណងប្រមាណ ២៦៧,៧លានដុល្លារ ដើម្បីចូលរួមចំណែកដល់រាជរដ្ឋាភិបាលកម្ពុជាក្នុងការអភិវឌ្ឍសេដ្ឋកិច្ចសង្គម ដោយផ្តោតលើវិស័យអាទិភាពចំនួន៤ រួមមាន៖ ១-វិស័យគ្រប់គ្រងទឹក និងសុខភាពសាធារណៈ, ២-វិស័យអប់រំ, ៣-វិស័យអភិវឌ្ឍជនបទ និង ៤-វិស័យដឹកជញ្ជូន។ បញ្ជាក់ថា « ដោយឡែក សម្រាប់ឆ្នាំ២០២០ ជំនួយឥតសំណង របស់ KOICA ដល់កម្ពុជាមានចំនួនសរុប ២៤,៥លានដុល្លារ»។
ចាប់ពីឆ្នាំ២០១៩ ដល់២០២០ ជំនួយកូរ៉េក្នុងវិស័យហេដ្ឋារចនាសម្ព័ន្ធកើនឡើងពី ៣៥០ទៅ ៧០០លានដុល្លារ បានរួមចំណែកតភ្ជាប់ស្ពានថ្នល់ពីខេត្តមួយទៅខេត្តមួយ ដូចជាផ្លូវជាតិលេខ២២ ផ្លូវជាតិលេខ២ និងផ្លូវជាតិលេខ៤៨ ជាដើម។ បើតាមគេហទំព័រសមាគមសំណង់កម្ពុជា ដែលបានដកស្រង់ពីអង្គភាពព័ត៌មាន និងប្រតិកម្មរហ័ស។
គេហទំព័រនេះ បានបន្តថា ដោយឡែកបើរាប់លើគម្រោងអភិវឌ្ឍជារួម គិតត្រឹមខែវិច្ឆិកា ឆ្នាំ២០១៩ កូរ៉េខាងត្បូងបានផ្តល់ហិរញ្ញប្បទានដល់កម្ពុជាប្រមាណដល់ទៅ ៨៨៩លានដុល្លារ សម្រាប់ ២៣គម្រោង តែកម្ពុជាបានបើកប្រើប្រាស់អស់ត្រឹមប្រមាណ ៤៤២ លានដុល្លារប៉ុណ្ណោះ។ សម្រាប់ឆ្នាំ២០១៩ ដល់២០២៣ កូរ៉េកំពុងត្រៀមផ្តល់នូវទឹកប្រាក់ឥណទានប្រមាណ ៧០០លានដុល្លារ។
ដោយ៖ Moeun Dyna
