ភ្នំពេញ៖ គម្រោងផ្លូវល្បឿនលឿនភ្នំពេញ ព្រះសីហនុ ឆ្លងកាត់ខេត្តកំពង់ស្ពឺ លោក អភិបាលខេត្តបានដោះស្រាយផលប៉ះពាល់បានជាង ៩០ភាគរយ គិតដើមខែកញ្ញានេះ ដែលមានប្រជាពលរដ្ឋ ៣០០០គ្រួសារ ប៉ុន្តែនៅសល់តែប៉ុន្មានគ្រួសារប៉ុណ្ណោះកំពុងដោះស្រាយ។
តាមការថ្លែងឱ្យបញ្ជាក់ពី លោក វ៉ី សំណាង អភិបាលខេត្តកំពង់ស្ពឺថា នៅសល់តែប្រជាពលរដ្ឋនៅក្នុងភូមិពានទុង មួយចំនួនតូចប៉ុណ្ណោះ។ បើតាមគម្រោង នឹងត្រូវប្រជុំជាមួយពួកគាត់នៅថ្ងៃទី៤ ខែកញ្ញានេះ ប៉ុន្តែដោយសារតែត្រូវចូលរួមប្រជុំគណៈរដ្ឋមន្ត្រី តាមរយៈវីដេអូជាមួយសម្ដេច ហ៊ុន សែន នាយករដ្ឋមន្ត្រី ត្រូវពន្យាពេលជួបជាមួយពួកគាត់ រហូតដល់ថ្ងៃទី៧ សប្ដាហ៍ក្រោយវិញ។
លោក អភិបាលខេត្ត ថា សម្រាប់ការដោះស្រាយផលប៉ះពាល់លើគម្រោងមួយនេះ ហាក់មិនមានផលលំបាកនោះទេ ដោយសារតែប្រជាពលរដ្ឋភាគច្រើនបានយល់ និងចូលរួមជាមួយរាជរដ្ឋាភិបាលលើការអភិវឌ្ឍប្រទេសជាតិ ឱ្យកាន់តែមានភាពរីកចម្រើនទៅមុខ។
សូមរម្លឹកថា គម្រោងសាងសង់ផ្លូវល្បឿនលឿននេះ បានបើកការដ្ឋានសាងសង់ជាផ្លូវការកាលពី ថ្ងៃទី២២ ខែមីនា ឆ្នាំ២០១៩កន្លង ក្រោមអធិបតីភាព សម្តេច នាយករដ្ឋមន្ត្រី។ ក្នុងពិធីនោះ សម្តេចបានថ្លែងថា «គម្រោងនេះ គឺជាប្រវត្តិសាស្ត្រមួយសម្រាប់កម្ពុជា ក្នុងការសាងសង់ផ្លូវល្បឿនលឿនភ្នំពេញ-ព្រះសីហនុ»។
គូសបញ្ជាក់ថា គម្រោងសាងសង់ផ្លូវខាងលើ ឆ្លងកាត់រាជធានីភ្នំពេញប្រវែង ៨,៣០គីឡូម៉ែត្រ, ខេត្តកណ្តាល ៩,១០គីឡូម៉ែត្រ, កំពង់ស្ពឺ ៨០,៨០គីឡូម៉ែត្រ, ខេត្តកោះកុង ១,៩២គីឡូម៉ែត្រ និងខេត្តព្រះសីហនុ ៨៩,៨៩គីឡូម៉ែត្រ។ ការស្ថាបនាផ្លូវនេះ ក្នុងគម្រោងចំណាយថវិកាសរុបជាង ២,០០០លានដុល្លារ ជាទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន (CRBC) តាមរយៈក្រុមហ៊ុន Cambodian PPSHV Expressway Co., Ltd។ គម្រោងនេះ ត្រូវបានផ្តល់ការប្រឹក្សាបច្ចេកទេសសាង សង់ដោយក្រុមហ៊ុនទីប្រឹក្សាបច្ចេកទេស Minconsult SDN BHD ប្រើរយៈពេលសាងសង់ ៤៨ខែ ដោយគិតចាប់ពីខែមីនា ឆ្នាំ២០១៩ ដល់ខែមីនា ឆ្នាំ២០២៣៕
ដោយ៖ Moeun Dyna
