Register Already an agent ? Login

អាជ្ញាធរខេត្តបាត់ដំបង ដុតបំផ្លាញប្រហិតខូចគុណភាពជាង ២ពាន់គីឡូក្រាម ដែលនាំចូលពីប្រទេសជិតខាង

ភ្នំពេញ៖ មន្រ្តីជំនាញខេត្តបាត់ដំបង បានដុតបំផ្លាញប្រហិត ខូចគុណភាពចំនួន ២,៤៥០គីឡូក្រាម ដែលឈ្មួញទុច្ចរិតនាំចូលពីប្រទេសជិតខាងបម្រុងនឹងយកមកលក់ចែកចាយបន្តនៅក្នុងខេត្តបាត់ដំបង ប៉ុន្តែត្រូវបានសមត្ថកិច្ច បង្រ្កាបបានទាន់​ពេលវេលា។ បើតាមការឱ្យដឹងពីទំព័រហ្វេសប៊ុកស្នងការដ្ឋាននគរបាលខេត្តបាត់ដំបង។

នគរបាលខេត្តបានឱ្យដឹងថា ដោយបានការអនុញ្ញាតពី លោក អ៊ុច សុខុន ស្នងការ​ដ្ឋាននគរបាលខេត្តបាត់ដំបង និងស្ថិតក្រោមការ​ដឹកនាំរបស់ លោក គឺ បុណ្ណរ៉ា ព្រះរាជអាជ្ញារងខេត្ត លោក ចេង ឡេង ស្នងការរងផែនការប្រឆាំងបទល្មើសសេដ្ឋកិច្ច បានដឹកនាំកម្លាំងជំនាញ ដែលមាន លោក យី យក់សាន នាយការិយាល័យ​នគរ​បាលប្រឆាំងបទល្មើសសេដ្ឋកិច្ច ចូលរួមសហការ​ណ៍ជាមួយរដ្ឋបាលក្រុង អាជ្ញាធរមូល​ដ្ឋាន អង្គភាពជំនាញសាខាកាំកុងត្រូល និងផ្នែកពាក់ព័ន្ធ បានដុតបំផ្លាញចោលនូវសាច់ប្រហិតចម្រុះខូចគុណភាពចំនួនខាងលើ។

បើតាមការឱ្យដឹង ពីមន្រ្តីសាខា ក.ប.ប ខេត្តបាត់ដំបង ថា ប្រហិតចម្រុះខូចគុណភាពចំនួនចទាំងនោះ ដុចកម្ទេចចោលនៅទីចាក់សំរាម ក្នុងភូមិ ជ្រៃកោង សង្កាត់ស្លាកែត ក្រុងបាត់ដំបង។ មន្រ្តីដដែលបញ្ជាក់ ប្រហិតចម្រុះខូចគុណភាពទាំងនេះ ត្រូវបានមន្រ្តីជំនាញ ត្រួតពិនិត្យឃើញ និងរឹបអូសបាននៅឃុំអូដារ ស្រុកកំរៀង ខេត្តបាត់ដំបង កាលពីថ្ងៃទី២៨ ខែមិថុនា ឆ្នាំ២០២០។

លោក អ៊ុច សុខុន បានអំពាវនាវដល់អ្នកប្រកបមុខរបរខាងលើ ត្រូវបញ្ឈប់ជាប​ន្ទាន់​ចំពោះការលួចនាំចូល នូវប្រភេទ(ប្រហិតឬ​សាច់មាន ឬជង្គង់មាន់)ខូចគុណភាព យកមក​លក់​ចែកចាយដល់ប្រជាពលរដ្ឋនៅក្នុង ខេត្តបាត់​ដំ​បង ព្រោះប្រភេទសាច់ខូចគុណភាពទាំងនេះ ពិតជាបានបង្កផលប៉ះពាល់ខ្លាំងណាស់ចំពោះអ្នកប្រើប្រាស់។

លោក ស្នងការបន្ថ អំពាវនាវដល់បងប្អូនប្រជាពលរដ្ឋនៅមូលដ្ឋាន ប្រុងប្រយ័ត្នឱ្យបានខ្ពស់បំផុតចំពោះការទិញ ឬការបរិភោគផលិតផលទាំងនេះ ពីព្រោះវា​ប៉ះពាល់ដល់សុខភាពអ្នកប្រើប្រាស់ខ្លាំងណាស់៕

ដោយ៖ឌីណា