ភ្នំពេញ៖ រយៈពេល៩ខែឆ្នាំ២០២៤ កំពង់ផែស្វយ័តភ្នំពេញ មានបរិមាណទំនិញ និងប្រេងឥន្ធនៈឆ្លងកាត់ជាង ៣,៥លានតោន កើនជិត ១៤%។ តាមសេចក្តីប្រកាសរបស់កំពង់ផែស្វយ័តភ្នំពេញ។
បរិមាណកុងតឺន័រឆ្លងកាត់មាន ៣៦៥ ៩៨៧ធីអ៊ីយូ កើនជិត ២០% ,បរិមាណនាវាសរុបមានជាង ៤ពាន់ កើនជាង ២៥%, បរិមាណនាវាដឹកអ្នកដំណើរឆ្លងកាត់មានចំនួន៤៤៥ កើនជាង ២៦% និងចំនួនអ្នកដំណើរឆ្លងកាត់មាន ២៣ ៦៦៧ កើនប្រមាណ ៦៦%។ បើតាមសេចក្តីប្រកាសខាងលើ។
ដោយឡែក ខែកញ្ញា កំពង់ផែស្វយ័តភ្នំពេញ មានបរិមាណទំនិញ និងប្រេងឥន្ធនៈឆ្លងកាត់ ៤២ ៤ ៤៤៧តោន ធៀបនឹងខែកញ្ញាឆ្នាំ២០២៣ ដែលមានចំនួន ៣៣៧ ៦០០តោន កើនជាង ២៥% និងបរិមាណកុងតឺន័រឆ្លងកាត់មាន ៥២ ២៨៣ ធីអ៊ីយូ កើនជាង ៤៥% ,បរិមាណនាវាសរុបមានចំនួន ៤៥៣គ្រឿង កើនជាង ១៣៤% និងចំនួនអ្នកដំណើរឆ្លងកាត់មាន ២ ៤៣៥នាក់ កើនប្រមាណ ១១%។
រយៈពេល ៩ខែ គិតចាប់ពីខែមករា ដល់ខែកញ្ញា ឆ្នាំ២០២៤ ការធ្វើពាណិជ្ជកម្មអន្តរជាតិរបស់កម្ពុជា មានទឹកប្រាក់សរុប ៤០,៩៤ពាន់លានដុល្លារ កើនឡើង ១៦,៤% បើធៀបនឹងគ្រាដូចគ្នាឆ្នាំ២០២៣ ដែលមានចំនួន ៣៥,១៦ពាន់លានដុល្លារ។ តាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា។
ក្នុងនោះ កម្ពុជាសម្រេចបានទឹកប្រាក់ជាង ១៩,៨៣ពាន់លានដុល្លារ ពីការនាំទំនិញចេញទៅក្រៅប្រទេស កើន ១៧% បើធៀបនឹងគ្រាដូចគ្នាឆ្នាំ២០២៣ មានទំហំទឹកប្រាក់ ១៦,៩៤ពាន់លានដុល្លារ ចំណែក ការនាំទំនិញចូលមកវិញមានទំហំទឹកប្រាក់ ២១,១០ពាន់លានដុល្លារ កើនឡើង ១៥,៩%៕
ដោយ៖ មឿន ឌីណា (Moeun Dyna)
