ភ្នំពេញ៖ រយៈពេល ២ខែ ឆ្នាំ២០២៣ ចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបានជាក់ស្ដែងតាមប្រព័ន្ធ គ្រប់គ្រងទិន្នន័យចំណូលអនឡាញមានចំនួន ២១៨៣,៨៩ប៊ីលានរៀល (ប្រមាណជា ៥៣៩,២៣លានដុល្លារ) ស្មើនឹង ១៥,១០% នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ២០២៣ ប្រៀបធៀបនឹងចំណូលពន្ធ-អាករក្នុងរយៈពេលដូចគ្នា ឆ្នាំ២០២២ ឃើញថាកើនឡើងចំនួន ១០៩,៣៣ប៊ីលានរៀល (ប្រមាណជា ២៧,០០ លានដុល្លារ) ស្មើនឹង ៥,២៧%។
លើសពីនេះ សម្រាប់រយៈពេល ២ខែ ឆ្នាំ២០២៣ ចំណូលពីប្រភេទពន្ធសំខាន់ៗបានរក្សាកំណើនធៀបនឹងរយៈពេល ដូចគ្នាក្នុងឆ្នាំ២០២២ ក្នុងនោះ ពន្ធលើប្រាក់ចំណូល ១៤,៧៩% អាករលើតម្លៃបន្ថែម ៨,៩៣% និងពន្ធលើប្រាក់បៀវត្ស ១១,០១%។
នៅក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែកុម្ភៈ និងសម្រាប់រយៈពេល២ខែ ឆ្នាំ២០២៣ កាលថ្ងៃទី១៤ ខែមីនា ឆ្នាំ២០២៣ លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារលើកឡើងថា ក្នុងខែកុម្ភៈ ឆ្នាំ២០២៣ ចំណូលពន្ធ-អាករគ្រប់ប្រភេទ ដែលអគ្គនាយកដ្ឋានពន្ធដារប្រមូលបានជាក់ស្ដែងតាមប្រព័ន្ធគ្រប់គ្រងទិន្នន័យចំណូលអនឡាញមានចំនួន ៩៦៦,៣២ប៊ីលានរៀល (ប្រមាណជា ២៣៨,៦០លានដុល្លារ) ស្មើនឹង ៦,៦៨%។
លោក បានបន្តថា ប្រៀបធៀបនឹងចំណូល ពន្ធ-អាករប្រចាំខែកុម្ភៈ ឆ្នាំ២០២២ ឃើញថាកើនឡើងចំនួន ៥៩,២៩ប៊ីលានរៀល (ប្រមាណជា ១៤,៦៤ លានដុល្លារ) ស្មើនឹង ៦,៥៤%។
អគ្គនាយកដ្ឋានពន្ធដារបានផ្តួចផ្តើម ហើយនឹងដាក់ចេញឱ្យអនុវត្តនូវE-Administration ក្នុងត្រីមាសទី២ ឆ្នាំ២០២៣ ក្នុងគោលដៅពង្រឹងគុណភាពសេវាសាធារណៈបន្ថែមទៀតចំណូលពន្ធពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក(E-Commerce) ទទួលបានប្រមាណជា ១៤,៨៧លានដុល្លារ។ បើតាមការបន្តទៀតរបស់ លោក គង់ វិបុល។
លោក គង់ វិបុល បានបន្ថែមថា អគ្គនាយកដ្ឋានពន្ធដារមានវិធានការចុះអង្កេតសហគ្រាស ដោយបានរកឃើញអាជីវកម្មជាច្រើនក្នុងនោះមានក្លិបកម្សាន្តធំៗ មួយចំនួនមិនបានចុះបញ្ជីពន្ធដារឬចុះបញ្ជីមិនបានត្រឹមត្រូវតាមកម្រិតផលរបរ។ ខ្ញុំសូមរំឭកឱ្យម្ចាស់អាជីវកម្ម ដែលមិនទាន់បាន ចុះបញ្ជីពន្ធដារ ឱ្យមកបំពេញកាតព្វកិច្ចចុះបញ្ជីពន្ធដារ និងធ្វើបច្ចុប្បន្នភាពព័ត៌មានសហគ្រាស ចៀសវាងនូវការ ផាកពិន័យទោសទណ្ឌនានា។
សម្រាប់រដូវកាលប្រកាសពន្ធលើប្រាក់ចំណូលប្រចាំឆ្នាំ អគ្គនាយកនៃអគ្គនាយកដ្ឋានពន្ធដាររូបនេះ បានបង្ហាញពីការរំពឹងថាការប្រកាសនិងបង់ប្រាក់ពន្ធលើប្រាក់ចំណូលសម្រាប់ឆ្នាំ២០២២ នឹងទទួលបាននូវលទ្ធផលល្អប្រសើរនិងមិនមានការថមថយឡើយ តាមរយៈ ប្រព័ន្ធពន្ធដារ E-Filing និង ToI E-Filing ដែលរឹងមាំនិងមានតម្លាភាព និងជាយន្តការយ៉ាងសំខាន់ក្នុងការពង្រឹង ការផ្ទៀងផ្ទាត់ការដាក់លិខិតប្រកាសនិងបង់ប្រាក់ពន្ធ (Cross check)។ បើតាមការបន្ថែមទៀតរបស់ លោក គង់ វិបុល។
គូសបញ្ជាក់ថា ជាក់ស្ដែងនៅឆ្នាំ២០២២ អគ្គនាយកដ្ឋានពន្ធដារ ប្រមូលចំណូល សម្រេចបានលើសផែនការខ្ពស់រហូតដល់ចំនួន ២២,៥៧% បើទោះបីជាសេដ្ឋកិច្ចកម្ពុជា បានរងនូវវិបត្តិនៃការធ្លាក់ចុះសេដ្ឋកិច្ចពិភពលោកបណ្ដាលមកពីសង្គ្រាមរុស្ស៊ី-អ៊ុយក្រែន និងវិបត្តិនៃជំងឺកូវីដ-១៩ នៅបន្តមាននៅឡើយ។
ដោយឡែក ក្នុងឆ្នាំ២០២៣នេះ បើទោះបីជាសេដ្ឋកិច្ចកម្ពុជា បន្តទទួលរងនូវវិបត្តិនៃការធ្លាក់ចុះសេដ្ឋកិច្ចសកលលោកបណ្ដាលមក ពីសង្គ្រាមរុស្ស៊ី-អ៊ុយក្រែន សង្គ្រាមពាណិជ្ជកម្ម ភាពតានតឹងនៃភូមិសាស្ត្រនយោបាយ និងវិបត្តិនៃជំងឺកូវីដ-១៩ មិនទាន់ចប់នៅឡើយក៏ផែនការចំណូលពន្ធត្រូវបានកំណត់ឱ្យមានការកើនឡើងប្រមាណជិត ៣០% នៃផែនការចំណូលឆ្នាំ២០២២៕
ដោយ៖ មឿន ឌីណា (Moeun Dyna)
