ភ្នំពេញ៖ កិច្ចព្រមព្រៀង ពាណិជ្ជកម្មសេរីកម្ពុជា-សាធារណរដ្ឋកូរ៉េ (CKFTA) សម្រាប់ការនាំចេញ នឹងបំពេញបន្ថែមទៅលើកិច្ចព្រមព្រៀងពាណិជ្ជកម្មសេរីអាស៊ាន-កូរ៉េ និងកិច្ចព្រមព្រៀងអាសិប (RCEP) ដែលមានស្រាប់។ បើតាមការថ្លែងរបស់ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានបន្តថា នៅក្រោមកិច្ចព្រមព្រៀង CKFTA កម្ពុជា បានបើកទីផ្សារ ចំនួន ៨៩.០៩% នៃបន្ទាត់ពន្ធគយសរុប ខណៈដែលភាគីកូរ៉េបានបើកទីផ្សារចំនួន ៩៥.០៣% នៃបន្ទាត់ពន្ធគយសរុប។

នៅ​ពិធី​បើក​សិក្ខាសាលា​ផ្សព្វផ្សាយ ស្តីពី​ការអនុវត្ត​កិច្ចព្រមព្រៀង ពាណិជ្ជកម្ម​សេរី​កម្ពុជា​-​សាធារណរដ្ឋ​កូរ៉េ (CKFTA) សម្រាប់​ការនាំចេញ កាលពីថ្ងៃទី២៤ ខែវិច្ឆិកា ឆ្នាំ២០២២ លោក ប៉ាន សូរស័ក្ដិ បានបញ្ជាក់ថា ក្នុងនោះកម្ពុជានឹងអាចនាំចេញទំនិញក្នុងអត្រាពន្ធគយសូន្យភ្លាមៗ បន្ទាប់ពីកិច្ចព្រមព្រៀងចូលជាធរមាននៅថ្ងៃទី១ ខែធ្នូ ឆ្នាំ២០២២ ចំនួន ៩២.៣៧% នៃបន្ទាត់ពន្ធគយសរុប។

ជាមួយគ្នានេះ រដ្ឋមន្ត្រីក្រសួងពាណិជ្ជកម្មកម្ពុជា មានសុទិដ្ឋិនិយមថា កិច្ចព្រមព្រៀង CKFTA ដែលនឹងចូលជាធរមាននៅថ្ងៃទី១ ខែធ្នូ ឆ្នាំ២០២២ ខាងមុខនេះ នឹងបង្កើនទំហំពាណិជ្ជកម្មរវាងប្រទេសទាំងពីរ និងបង្កើត កាលានុវត្តភាពនាំចេញថ្មីៗបន្ថែមទៀត។

សិក្ខាសាលាផ្សព្វផ្សាយនេះ រៀបចំឡើងក្នុងគោលបំណងលើកកម្ពស់ការយល់ដឹង និងផ្សព្វផ្សាយអំពីនីតិវិធីនៃការនាំចេញដល់វិស័យឯកជន ដើម្បីជំរុញការនាំចេញ និងការទាញយកអត្ថប្រយោជន៍ជាអតិបរិមាពីការអនុវត្តកិច្ចព្រមព្រៀង CKFTA ធៀបនឹងកិច្ចព្រមព្រៀងនានាដែលមានស្រាប់ ព្រមទាំងមានសមត្ថភាពក្នុងការបំពេញបែបបទនាំចេញ ដោយអនុលោមតាមនីតិវិធីនៃវិធានដើមកំណើតទំនិញ ជាពិសេសជំរុញដល់កំណើនការនាំចេញតាមរយៈការប្រើប្រាស់វិញ្ញាបនបត្របញ្ជាក់ដើមកំណើតទំនិញតាមកិច្ចព្រមព្រៀង CKFTA។ បើតាមការបញ្ជាក់របស់ លោក ប៉ាន សូរស័ក្ដិ។

ក្នុង​រយៈពេល​៩​ខែ ឆ្នាំ​២០២២ ទំហំ​ពាណិជ្ជ​រវាង​កម្ពុជា-កូរ៉េខាងត្បូង មានតម្លៃ​ជាង ៦០០​លាន​ដុល្លារ ពោលគឺ​កើនឡើង ៣% បើ​ធៀប​នឹង​ឆ្នាំ២០២១ ក្នុងនោះ​កម្ពុជា​នាំ​ចេញទៅ​កូរ៉េ​មានតម្លៃ ១៧៥លាន​ដុល្លារ កើនឡើង​ ២១% និង​នាំ​ទំនិញ​ពី​កូរ៉េ​មកវិញ​ក្នុងតម្លៃ ៤២៦លាន​ដុល្លារ ថយចុះ ​៣​%​។​ បើតាមតាម​របាយការណ៍​របស់​ក្រសួងពាណិជ្ជកម្ម​កម្ពុជា។

ពាក់ព័ន្ធ​នឹង​ការចូល​ជាធរ​មាននូវ​កិច្ចព្រមព្រៀង​ពាណិជ្ជកម្ម​សេរី​កម្ពុជា​-​កូរ៉េ នេះដែរ ក្នុងជំនួប​ពិភាក្សា​ការងារ​ទ្វេភាគី ក្នុងឱកាស​នៃ​កិច្ចប្រជុំ​កំពូល​អាស៊ាន និង​កិច្ចប្រជុំ​កំពូល​ពាក់ព័ន្ធ​នៅ​កម្ពុជា ប្រធានាធិបតីកូរ៉េខាងត្បូង​ លោក Yoon Suk Yeol ក៏បាន​សាទរ​ចំពោះ​កិច្ចសហប្រតិបត្តិការ​សេដ្ឋកិច្ច និង​ការកើនឡើង​នូវ​ការផ្លាស់ប្ដូរ​ពាណិជ្ជកម្ម​ទ្វេភាគី​រវាង​ប្រទេស​ទាំង​២។

​លោក Yoon Suk ​មាន​សុទិដ្ឋិនិយម​ថា កិច្ចព្រមព្រៀង​ពាណិជ្ជកម្ម​សេរី នឹង​ធ្វើឱ្យ​កើនឡើង​យ៉ាងខ្លាំង​នូវ​ទំហំ​ពាណិជ្ជកម្ម​ទ្វេភាគី ពិសេស​នឹង​ជំរុញឱ្យមាន​ការវិនិយោគ​របស់​កូរ៉េ​ច្រើន​ថែមទៀត​នៅ​កម្ពុជា​ផងដែរ​។

ថ្លែង​ក្នុងជំនួប​ពិភាក្សា​ការងារ​ សម្ដេចតេជោ នាយក​រដ្ឋមន្ត្រី​ ហ៊ុន សែន ក៏បាន​កត់សម្គាល់​ដោយ​រីករាយ​ចំពោះ​ការកើនឡើង​នូវ​ការវិនិយោគ​របស់​សាធារណរដ្ឋ​កូរ៉េ ដែល​ធ្វើឱ្យ​កូរ៉េ​ឈរ​នៅ​លេខ​រៀង​ទី​២ ក្នុងចំណោម​ដៃគូ​វិនិយោគ​ធំៗ​របស់​កម្ពុជា។

នាឱកាសនោះ ប្រមុខរាជរដ្ឋាភិបាលកម្ពុជា ក៏បាន​ស្នើ​ដល់​ លោក Yoon Suk ឱ្យ​លើកទឹកចិត្ត​ជំរុញ​ការវិនិយោគ​របស់​កូរ៉េ ឱ្យ​កាន់តែច្រើន​ថែមទៀត​នៅ​កម្ពុជា បន្ទាប់ពី​កិច្ចព្រមព្រៀង​ពាណិជ្ជកម្ម​សេរី​កម្ពុជា​-​កូរ៉េ បាន​អនុវត្ត​ពេញលេញ​។

សូមរម្លឹកថា កិច្ចព្រមព្រៀងពាណិជ្ជកម្មសេរី CKFTA នេះ ត្រូវបានផ្តួចផ្តើមឡើងដោយ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងដំណើរទស្សនកិច្ចផ្លូវរដ្ឋរបស់ ប្រធានាធិបតី MOON Jae-In នៃសាធារណរដ្ឋកូរ៉េ មកកាន់ព្រះរាជាណាចក្រកម្ពុជា កាលពីខែមីនា ឆ្នាំ២០១៩។

បន្ទាប់ពីទទួលបានគោលការណ៍ឯកភាព និងសិទ្ធិប្រទានពីរាជរដ្ឋាភិបាលកម្ពុជា កិច្ចព្រមព្រៀង CKFTA នេះត្រូវបានចុះហត្ថលេខាជាផ្លូវការជាបីភាសាគឺភាសាខ្មែរ ភាសាកូរ៉េ និងភាសាអង់គ្លេស ដោយរដ្ឋមន្ត្រីពាណិជ្ជកម្មនៃប្រទេសទាំងពីរកាលពីថ្ងៃទី២៦ ខែតុលា ឆ្នាំ២០២១ តាមប្រព័ន្ធវីដេអូ។

កម្ពុជា បានផ្តល់សច្ចាប័នលើកិច្ចព្រមព្រៀងទ្វេភាគីនេះ នៅថ្ងៃទី២៩  ខែមករា ឆ្នាំ២០២២ ខណៈភាគីកូរ៉េបានបញ្ចប់នីតិវិធីផ្ទៃក្នុងរបស់ខ្លួន និងបានជូនដំណឹងមកកម្ពុជាតាមរយៈកំណត់ទូត ចុះថ្ងៃទី២ ខែតុលា ឆ្នាំ២០២២។

កិច្ចព្រមព្រៀងពាណិជ្ជកម្មសេរីទ្វេភាគីនេះ ត្រូវការរយៈពេល ៦០ថ្ងៃ ដើម្បីចូលជាធរមានបន្ទាប់ពីភាគីជូនដំណឹងទៅវិញទៅមកតាមផ្លូវការទូត អំពីការបញ្ចប់នីតិវិធីផ្ទៃក្នុងនៃការផ្តល់សច្ចាប័នរបស់ខ្លួន ដូចនេះកិច្ចព្រមព្រៀងនេះនឹងចូលជាធរមាននៅថ្ងៃទី១ ខែធ្នូ ឆ្នាំ២០២២ ខាងមុខនេះ៕

ដោយ៖ មឿន ឌីណា (Moeun Dyna)