ភ្នំពេញ៖ ការប្រមូលចំណូលថវិការដ្ឋសម្រេចបាន ១៦,៤៣០ពាន់លានរៀល (៣,៩៨៥.៩៣លានដុល្លារ) ស្មើនឹង ៧០ % ខណៈចំណូលសារពើពន្ធនៅតែបន្តរួមចំណែកខ្ពស់រហូតដល់ ៩៣% នៃចំណូលសរុប។ ដោយឡែក ចំពោះការអនុវត្តចំណាយថវិកាជាតិសម្រេចបាន ១៥,២៧១ពាន់លានរៀល (ប្រមាណ ៣,៧០៤.៧៥លាន ដុល្លារ) ស្មើនឹង ៥៧%។ បើ តាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី៦ ខែកញ្ញា ឆ្នាំ២០២២ បានដឹកនាំកិច្ចប្រជុំ «ការត្រួតពិនិត្យតាមដានវឌ្ឍនភាពនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៣ បូក២ ប្រចាំឆមាសទី១ ឆ្នាំ២០២២។
បើតាមកិច្ចប្រជុំ បានឱ្យដឹងថា ការអនុវត្តការងារកែទម្រង់ហិរញ្ញវត្ថុសាធារណៈកំពុងវិវត្តទៅរកប្រក្រតីភាព និងល្អឡើងវិញ បន្ទាប់ពីស្ថានភាពជំងឺកូវីដ-១៩ មានការថមថយក្នុងរយៈពេលចុងក្រោយនេះ ដែលឆ្លុះបញ្ចាំងពីភាពធន់នៃសេដ្ឋកិច្ច និងហិរញ្ញវត្ថុសាធារណៈ ភាពបត់បែនការអនុវត្តគោលនយោបាយ និងយុទ្ធសាស្ត្រ និងចីរភាពនៃការអនុវត្តការងារកែទម្រង់ការគ្រប់គ្រងហិរញ្ញវត្ថុសាធារណៈ។
ការត្រួតពិនិត្យ និងវាយតម្លៃលើការអនុវត្តការងារកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៣ បូក២ ប្រចាំឆមាសទី១ ឆ្នាំ២០២២ បានឆ្លុះបញ្ចាំងឱ្យឃើញថា ភាពជឿទុកចិត្តនៃថវិកានៅរក្សាភាពធន់ និងអាចទុកចិត្តបាន តាមរយៈការបន្តពង្រឹងការគ្រប់គ្រងការប្រមូលចំណូល ការធ្វើទំនើបកម្មរដ្ឋបាលចំណូល និងគោលនយោបាយពន្ធ និងការពង្រឹងលើប្រសិទ្ធភាពចំណាយ។ បើតាមកិច្ចប្រជុំខាងលើ។
បើតាមភ្នំពេញប៉ុស្តិ៍ បានស្រង់សំដី លោក ហុង វណ្ណៈ អ្នកសេដ្ឋកិច្ចរាជបណ្ឌិត្យសភាកម្ពុជាថា ការធ្វើកំណែទម្រង់ និងការដាក់ចេញគោលនយោបាយថ្មីៗជាបន្តបន្ទាប់របស់រដ្ឋាភិបាល គឺមិនត្រឹមតែធ្វើឱ្យប្រទេសកម្ពុជារីកចម្រើន និងការទទួលស្គាល់ពីអន្តរជាតិកាន់តែច្រើនប៉ុណ្ណោះទេ សូម្បីតែការប្រមូលចំណូលថវិកាជាតិ ក៏មានសម្ទុះកើនឡើងដែរ។
មានកត្តាចម្បងៗមួយចំនួនកំពុងរួមចំណែកធ្វើឱ្យការប្រមូលចំណូលកើនដែលមានដូចជា៖ កត្តាស្ថិរភាពនយោបាយ ការគ្រប់គ្រងម៉ាក្រូសេដ្ឋកិច្ចប្រកបដោយប្រសិទ្ធភាព ការគ្រប់គ្រងចំណូល និងកាត់បន្ថយការលេចធ្លាយចំណូល ការបើកដំណើរការឡើងវិញនៃអាជីវកម្មដែលទទួលផលប៉ះពាល់ពីកូវីដ-១៩ កំណើនលំហូរវិនិយោគក្រៅប្រទេស ព្រមទាំងការកើនឡើងសកម្មភាពពាណិជ្ជកម្មអន្តរជាតិ ជាដើម។ បើតាមការលើកឡើងបន្តរបស់ លោក ហុង វណ្ណៈ។
នៅពេលការប្រមូលចំណូលបានច្រើន នឹងផ្តល់លទ្ធភាពកាន់តែច្រើនឱ្យរដ្ឋាភិបាលអាចបញ្ចេញថវិកាទៅប្រើប្រាស់សម្រាប់ការវិនិយោគសាធារណៈ ដើម្បីបំពេញតម្រូវការរបស់ប្រជាពលរដ្ឋ ព្រមទាំងបង្កើនការទាក់ទាញវិនិយោគិនបរទេស។ បើតាមការបញ្ជាក់របស់ លោក ហុង វណ្ណៈ បានបន្ថែមថា ក្រៅពីនេះ ក៏ជួយឱ្យរាជរដ្ឋាភិបាលអាចយកទៅសងបំណុលបរទេស និងបង្កើនប្រាក់សន្សំសម្រាប់ត្រៀមក្នុងករណីមានប្រធានស័ក្តិកើតឡើងផងដែរ៕
ដោយ៖ មឿន ឌីណា (Moeun Dyna)