ភ្នំពេញ៖ លោក ម៉ុង ឫទ្ធី គ្រោងសាងសង់រោងចក្រផលិតចំណីសត្វថ្មី១ទៀត លើផ្ទៃដីទំហំ ២៤ហិកតា ទុនវិនិយោគ ៥៤លានដុល្លារ នឹងចាប់ផ្ដើមសាងសង់នៅចុងខែកុម្ភៈ ឆ្នាំ២០២៣ មានសមត្ថភាពផលិតចំណីសត្វបានប្រមាណ ៣៦ម៉ឺនតោន ក្នុង១ឆ្នាំ។ រោងចក្រនេះ ស្ថិតនៅផ្លូវជាតិលេខ៤ ក្នុងភូមិមនោរម្យ ឃុំតានៃ ស្រុកព្រៃនប់ ខេត្តព្រះសីហនុ។
ការវិនិយោគលើរោងចក្រផលិតចំណីសត្វនេះ គឺឆ្លើយតបនឹងតម្រូវការទីផ្សារក្នុងស្រុកដែលកំពុងកើនឡើង ហើយក៏ជួយលើកទឹកចិត្តដល់អ្នកផលិតនិងអ្នកចិញ្ចឹម ដើម្បីកាត់បន្ថយ និងឈានទៅដល់ការលុបបំបាត់ការនាំចូលសត្វពីក្រៅប្រទេសផងដែរ។ បើតាមការលើកឡើងរបស់ លោក ម៉ុង ឫទ្ធី ប្រធានក្រុមហ៊ុន ម៉ុង ឫទ្ធី គ្រុប។
លោក ម៉ុង ឫទ្ធី បានលើកឡើងបន្តថា រោងចក្រផលិតចំណីសត្វនេះនឹងផ្តោតលើការផលិតចំណីជ្រូក តាមរយៈការជំរុញការចិញ្ចឹមសត្វនៅកម្ពុជាឱ្យកាន់តែរីកចម្រើន និងការប្រកួតប្រជែងបន្ថែមទៀត។ ក្នុងដំណាក់កាលនេះក្រុមហ៊ុនមិនមានគម្រោងនាំចេញទៅលក់នៅទីផ្សារអន្តរជាតិទេ ដរាបណាមិនទាន់បំពេញតម្រូវការក្នុងស្រុកបានគ្រប់គ្រាន់។ លោក បានបញ្ជាក់ថា ការបង្កើនសមត្ថភាពផលិតកម្មចំណីសត្វនេះ ក៏ដើម្បីឱ្យប្រទេសកម្ពុជាអាចធានាបានសន្តិសុខស្បៀងដោយខ្លួនឯង និងមិនពឹងផ្អែកលើការនាំចូលពីបរទេស។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានប្រាប់ភ្នំពេញប៉ុស្ដិ៍ថា ការបង្កើតផលិតកម្មចំណីសត្វក្នុងស្រុក គឺពិតជាមានសារៈសំខាន់ណាស់ក្នុងការធ្វើឱ្យកម្ពុជាធានាបាននូវការផ្គត់ផ្គង់ដោយខ្លួនឯង ខណៈការផលិតក្នុងស្រុកក៏នឹងជួយឱ្យថ្លៃដើម សម្រាប់ការចំណាយលើការចិញ្ចឹមសត្វនៅកម្ពុជាអាចធ្លាក់ចុះមួយកម្រិតដែរ។
លោក បាននិយាយបន្តថា បច្ចុប្បន្ន កម្ពុជាមានរោងចក្រផលិតចំណីសត្វជាង ២០កន្លង ប៉ុន្តែពុំទាន់អាចផលិតផ្គត់ផ្គង់គ្រប់គ្រាន់នៅក្នុងទីផ្សារទេ ដោយការនាំចូលពីក្រៅប្រទេសអាចមានប្រហែល ២០% ភាគច្រើនមកពីវៀតណាម។ តម្លៃចំណី (ជ្រូក) ឆ្នាំ២០២២ បានកើនចន្លោះពី ១០-២០% ធៀបនឹងឆ្នាំ២០២១។
លោក សុខ រ៉ាដែន ប្រធានសមាគមវារីវប្បករកម្ពុជា បានស្វាគមន៍ការពង្រីកសមត្ថភាពក្នុងការផលិតចំណីសត្វរបស់ក្រុមហ៊ុន ម៉ុង ឫទ្ធី គ្រុប។ លោក គូសបញ្ជាក់ថា វានឹងជួយកាត់បន្ថយការពឹងផ្អែកទៅលើចំណីនាំចូលបានមួយចំណែក ហើយក៏ជួយធ្វើឱ្យសកម្មភាពនៃការចិញ្ចឹមសត្វនៅក្នុងស្រុក រួមទាំងផ្នែកវារីវប្បកម្មកាន់តែមានដំណើរការល្អ។ សង្ឃឹមថា ចំណីសត្វផលិតក្នុងស្រុកនឹងមានគុណភាពល្អ ហើយមានតម្លៃប្រកួតប្រជែងជាមួយផលិតផលនាំចូល។
បើតាម ក្រុមហ៊ុន ម៉ុង ឫទ្ធី គ្រុប ក្នុង១ឆ្នាំប្រទេសកម្ពុជាបានចំណាយប្រាក់ប្រមាណ ១៨០លានដុល្លារ ទៅលើការនាំចូលចំណីសត្វពីក្រៅប្រទេសមកបំពេញតម្រូវការចំណីសត្វនៅក្នុងស្រុក៕
ដោយ៖ មឿន ឌីណា (Moeun Dyna)
