ភ្នំពេញ៖ របាយការណ៍អគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា កម្ពុជា បាននាំចូលដែកនិងដែកថែប ចាប់ពីខែមករា-ខែកក្កដា ឆ្នាំ២០២២ ពីក្រៅប្រទេសនៅក្នុងទឹកប្រាក់សរុប ២១៥,២៦លានដុល្លារ កើន ២០,១% ធៀបនឹងឆ្នាំ ២០២១ ដែលមាន ១៧៩,១៨លានដុល្លារ។ ទឹកប្រាក់ការនាំចូលនេះ គឺស្មើនឹង ១,១% នៃចំនួនទឹកប្រាក់នាំចូលទំនិញសរុបរបស់កម្ពុជាចំនួន ១៩,០៥១.៣៣លានដុល្លារ។
នៅក្នុងរបាយការណ៍ អគ្គនាយកដ្ឋានគយ និងរដ្ឋាករកម្ពុជា បានបន្តថា ដោយឡែកក្នុងខែកក្កដា ឆ្នាំ២០២២ ទឹកប្រាក់នាំចូលដែកនិងដែកថែបមានចំនួន ២៩,៤៩លានដុល្លារ កើន ២០,៦% ធៀបនឹងខែកក្កដា ឆ្នាំ២០២១ ដែលមានចំនួន ២៤,៤៦លានដុល្លារ។ ប៉ុន្តែ អគ្គនាយកដ្ឋានគយ មិនបានបង្ហាញពីបរិមាណនៃការនាំចូលដែក និងដែកថែប ឡើយរយៈពេល ៧ខែឆ្នាំ២០២២នេះ។
បើតាម ភ្នំពេញប៉ុស្តិ៍ដែលបានស្រង់សំដី លោក សំ សុខនឿន ប្រធានសមាគមអចលនទ្រព្យសកលថា បន្ទាប់ពីបានស្ងប់ស្ងាត់ប្រមាណ ២ឆ្នាំវិស័យសំណង់នៅកម្ពុជាចាប់ផ្តើមមានដំណើរការល្អឡើងវិញបណ្តើរៗហើយ ក្រៅពីសកម្មភាពតាមការដ្ឋានសំណង់ បច្ចុប្បន្ន ចំនួននៃការបណ្ដាក់ទុនវិនិយោគលើការសាងសង់ថ្មីៗក៏ចាប់ផ្តើមកម្រើកឡើងវិញខ្លះៗដែរ។
លោក បានលើកឡើងបន្តថា កំណើនការនាំចូលដែក និងដែកថែប ក៏ដូចជាគ្រឿងសំណង់ផ្សេងៗនៅពេលនេះគឺបណ្តាលមកពីការគ្រប់គ្រងប្រកបដោយប្រសិទ្ធភាពនៃជំងឺកូវីដ-១៩ នៅកម្ពុជានិងការចាប់ផ្តើមបង្កើនល្បឿនសាងសង់គម្រោងមួយចំនួនដែលផ្អាក ឬកាត់បន្ថយល្បឿនសាងសង់នាពេលកន្លងមក។
លោក ហ៊ុយ វណ្ណា អគ្គលេខាធិការនៃសមាគមអ្នកអភិវឌ្ឍន៍លំនៅឋានកម្ពុជា ដែលភ្នំពេញប៉ុស្តិ៍បានស្រង់សំដីដែរបាននិយាយថា សកម្មភាពសាងសង់ពេលនេះមិនទាន់ល្អទេ ដោយសារមូលហេតុចម្បងៗមួយចំនួនដូចជា ការបន្តអូសបន្លាយការឆ្លងរាលដាលជំងឺកូវីដ១៩ លោក បានបញ្ជាក់ថា គឺវិស័យសំណង់នៅកម្ពុជានឹងបន្តនៅទ្រឹងយូរទៀត ខណៈអ្វីដែលមាននៅពេលនេះ គឺគ្រាន់តែជាការបន្តសកម្មភាពចាស់ៗដែលមានពីមុនមកតែប៉ុណ្ណោះ។
គួររម្លឹកថា កាលពីខែធ្នូ ឆ្នាំ២០២០ មានរោងចក្រផលិតដែកថែបរបស់ក្រុមហ៊ុន ហុងឌីសេង (ខេមបូឌា) ស្ទីល ឯ.ក ដោយវិនិយោគិនចិនក្នុងទឹកប្រាក់ ១៦,៧លានដុល្លារ បើកដំណើរការក្នុងខេត្តកំពង់ស្ពឺ ដែលអាចមានសមត្ថភាពផលិតបាន ៥០ម៉ឺនតោន ក្នុងដំណាក់កាលដំបូង៕
ដោយ៖ មឿន ឌីណា (Moeun Dyna)
