ភ្នំពេញ៖ រយៈពេល ១០ខែ ក្នុងឆ្នាំ២០២១នេះ ទំហំពាណិជ្ជកម្មទ្វេភាគីរវាងកម្ពុជានិងចិន មានចំនួនទឹកប្រាក់កើនរហូតដល់ ៨៩៣១លានដុល្លារ មានកំណើន ៣៨.៥៦% បើធៀបនឹងរយៈពេលដូចគ្នាកាលពីឆ្នាំ២០២០។ តាមតួលេខរបស់ក្រសួងពាណិជ្ជកម្មកម្ពុជា ដែលស្ថានទូតចិនប្រចាំកម្ពុជា បានផ្សាយនៅលើទំព័រហ្វេសប៊ុករបស់ខ្លួន កាលពីថ្ងៃទី២ ខែវិច្ឆិកា ឆ្នាំ២០២១។

ស្ថាតទូតចិនប្រចាំកម្ពុជា បានស្រង់តួលេខរបស់ក្រសួងពាណិជ្ជកម្មកម្ពុជាបន្តថា ក្នុងនោះ ទំហំនៃការនាំចេញរបស់កម្ពុជាទៅកាន់ប្រទេសចិនមានចំនួនប្រមាណ ១២២២លានដុល្លារ មានកំណើន ៤៩% បើធៀបនឹងរយៈពេលដូចគ្នាកាលពីឆ្នាំ២០២០។

ស្ថាតទូតចិន បានស្រង់បន្តថា រីឯទំហំនៃការនាំចូលពីប្រទេសចិនមកកាន់កម្ពុជាវិញមានចំនួនប្រមាណ ៧៧០៩លានដុល្លារ មានកំណើន ៣៧% បើធៀបនឹងរយៈពេលដូចគ្នាកាលពីឆ្នាំ២០២០។

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានបង្ហាញថា ពាណិជ្ជកម្មទ្វេភាគីរវាងកម្ពុជា-ចិន មានកំណើនកើនឡើងទោះបីជាស្ថិតក្នុងបរិបទជំងឺកូវីដ0-១៩ក៏ដោយ ដែលបង្ហាញឱ្យឃើញពីភាពខ្លាំងក្លា និងមានកម្លាំងឥទ្ធិពលនៃកិច្ចសហប្រតិបត្តិការសេដ្ឋកិច្ចនិងពាណិជ្ជកម្មរវាងប្រទេសទាំងពីរ។

បើតាមរបាយការណ៍របស់រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា រយៈពេល១១ ឆ្នាំ២០២១ កម្ពុជា នាំអង្ករទៅប្រទេសចិនមានបរិមាណសរុបចំនួន ២៦៥,២៤៤តោន (កើនឡើងចំនួន ៣០,៣០៤តោន ស្មើនឹង ១២.៩០%)។

ក្រៅពីអង្ករ ក៏នៅមានផលិតដូចជា គ្រាប់ស្វាយចន្ទីចំនួន ៤,៥៥២.៦៩តោន, ចំណិតដំឡូងមីក្រៀមចំនួន ៧០, ៧២០.១២តោន, ម៉្សៅដំឡូងមីមានចំនួន ២៧,៨០៧.៦០តោន, គ្រាប់ស្វាយចន្ទីមានចំនួន ៤,៥៥២.៦៩តោន, ផ្លែចេកស្រស់មានចំនួន ៣៤៩,៦៥៦.៤១តោន។

ផ្លែស្វាយស្រស់មានចំនួន ៦,៣៨.១៤តោន, ដំណាប់ស្វាយមានចំនួន ១៣ ២,៥៤.៤៦តោន, ទឹកស៊ីរ៉ូស្វាយមានចំនួន ១៤៨តោន, ថ្នាំជក់មានចំនួន ០,១០តោន។ ប៉ុន្តែ ការនាំកាកសំណល់ដំឡូងមីមានចំនួន ៨,១៨៥តោន (ថយចុះចំនួន -៣៤.១៥%)៕

ដោយ៖ មឿន ឌីណា (MNoeun Dyna)