ភ្នំពេញ៖ រយៈពេល១ខែ ក្រុមហ៊ុនរុករករ៉ែ Renaissance Minerals (Cambodia) Ltd បានផលិតមាសប្រមាណ ១៣៧គីឡូក្រាម ដែលជារ៉ែមាស ៩០ភាគរយ ដូច្នេះនេះវានឹងបង្កើតប្រាក់ចំណូលសម្រាប់ជាតិ។ បើតាមការថ្លែងឱ្យដឹងពី សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបន្តថា ខណៈដែល ក្រុមហ៊ុន KrisEnergy បានបញ្ជាទៅអ្នកបើកបរកប៉ាល់ផ្ទុកប្រេងឆៅរបស់កម្ពុជាចំនួន ២៩ម៉ឺនបារ៉ែល លួចដឹកចូលក្នុងទឹកដីប្រទេសថៃ។
នៅក្នុងពិធីបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ដល់កុមារនិងយុវជនដែលមានអាយុពី ១២ដល់១៧ឆ្នាំ កាលពីថ្ងៃទី១ ខែសីហា ឆ្នាំ២០២១ ក្នុងវិមានសន្តិភាព សម្ដេចតេជោ បានថ្លែងបន្តថា កម្ពុជា រំពឹងថានឹងទទួលបានប្រាក់ចំណូលបន្ថែមទៀតពីគម្រោងរ៉ែមាស ដែលរាជរដ្ឋាភិបាលធ្វើសម្បទានដល់ក្រុមហ៊ុនរុករករ៉ែរបស់ប្រទេសអូស្ដ្រាលី Renaissance Minerals (Cambodia) Ltd។
គម្រោងវិនិយោគលើរោងចក្រចម្រាញ់រ៉ែមាសលក្ខណៈឧស្សាហកម្មតម្លៃ ១២០លានដុល្លារ នៅក្នុងខេត្តមណ្ឌលគិរីរបស់ក្រុមហ៊ុន Renaissance ស្ថិតនៅតំបន់អូរខ្វាវ ស្រុកកែវសីមា ខេត្តមណ្ឌលគិរី នេះត្រូវបានដាក់សម្ពោធដោយ លោក ស៊ុយ សែម រដ្ឋមន្ត្រីក្រសួងរ៉ែ និងថាមពល។ បើតាមការថ្លែងបន្តទៀតរបស់ សម្ដេចតេជោ ហ៊ុន សែន បានបន្ថែមថា រោងចក្របានដំណើរការស្លចម្រាញ់រ៉ែមាសចាក់ដុំមាស និងបោះត្រាសម្គាល់លើដុំមាស (Gold Dore) ទី១ របស់ខ្លួនកាលពីថ្ងៃ ២១ ខែមិថុនា។
ប្រមុខរាជរដ្ឋាភិបាលកម្ពុជា រំពឹងថាផលិតផលមាសលក្ខណៈឧស្សាហកម្មពីជម្រករ៉ែតំបន់អូរខ្វាវនឹងផ្តល់ចំណូលដុលជាមធ្យមប្រមាណ ១៨៥លានដុល្លារ ក្នុង១ឆ្នាំ ក្នុងនោះចំណូលថវិកាជាតិពីសួយសារ និងសារពើពន្ធផ្សេងៗមាន ៤០លានដុល្លារក្នុង១ឆ្នាំ។ ថវិកានេះនឹងត្រូវយកមកប្រើក្នុងចរន្តថវិកាជាតិ ដើម្បីអភិវឌ្ឍសេដ្ឋកិច្ច និងសង្គម។
ចំពោះបញ្ហាបូមប្រេងឆៅវិញ ប្រមុខរាជរដ្ឋាភិបាលបានថ្លែងថា កាលពីថ្ងៃ២៩ ខែធ្នូ ឆ្នាំ២០២០ យើងបានប្រកាសដំណក់ប្រេងលើកដំបូង ប្រហែលបរាជ័យហើយ ដែលក្រុមហ៊ុន KrisEnergy គ្រោងបូមប្រេងក្នុងមួយថ្ងៃឱ្យបាន ៥៧០០បារ៉ែល តែជាក់ស្តែងក្រុមហ៊ុនមួយនេះ អនុវត្តការបូមប្រេងបានតែ ១០០០បារ៉ែល ក្នុងនោះប្រេងដែលក្រុមហ៊ុនបានបូមចេញដាក់កប៉ាលរួច ត្រូវបានក្រុមហ៊ុននាំចេញទៅបាត់ថែមទៀត។
ប្រមុខរាជរដ្ឋាភិបាលបានថ្លែងបន្តទៀតថា ក្រុមហ៊ុនទទួលខុសត្រូវ KrisEngery បានប្រកាសរំលាយក្រុមហ៊ុនកាលពីខែមិថុនា កន្លងទៅនេះ ដោយសារវិបត្តិបំណុលវណ្ឌក ឥឡូវនឹងក្រុមហ៊ុនក្ស័យធន វាបូកថែមទាំងទៅដោយកប៉ាល់ដែលយើងបូមដាក់ វារត់ចេញទៅបាត់ទៅ។ យើងទប់វាមិនទាន់ ចូលដល់ដីថៃរួចហើយ គេមានមេធាវីរបស់គេ គេជួលកប៉ាល់មកទុក ឥឡូវវាយកទៅទាំងអាប្រេងទៅបាត់អស់រលីង។
មុនពេលក្រុមហ៊ុន KrisEnergy ប្រកាសក្ស័យធន បានបូមប្រេងពីប្លុក A ចំនួន ២៩ម៉ឺនបារ៉ែល ដោយយករក្សាទុកនៅក្នុងកប៉ាល់ ដែលសព្វថ្ងៃកំពុងស្ថិតនៅប្រទេសថៃ។ បើតាមថ្លែងរបស់ លោក ជៀប សួរ អគ្គនាយកប្រេងកាតនៃក្រសួងរ៉ែ និងថាមពល ដែលបានប្រាប់ទៅ សារព័ត៌មានThmeyThmey កាលពីម្សិលមិញនេះ។
លោក បានបន្តថា កប៉ាល់ដែលលួចដឹកប្រេងកម្ពុជារត់ទៅបាត់ហ្នឹង គឺក្រុមហ៊ុន KrisEnergy បានជួលពីគេមក សម្រាប់ដំណើរការនៃអាជីវកម្មបូមប្រេងនៅកម្ពុជា ក្រោយយើងដាក់សំណើរទាមទារប្រេងនោះមកវិញ ម្ចាស់កប៉ាល់នោះ បានប្រាប់យើងថា ក្រុមហ៊ុន KrisEnergy បានជំពាក់លុយគាត់។
បើតាមសារព័ត៌មានដដែលបានស្រង់សំដី ជៀប សួរ បានបន្តថា មកទល់ពេលនេះ ក្រសួងរ៉ែ និងថាមពល កំពុងបន្តនិតីវិធីដោះស្រាយផ្នែកច្បាប់ ជាមួយក្រុមហ៊ុន KrisEnergy ខណៈក្រុមហ៊ុននេះក៏កំពុងដំណើរការរឿងក្ដីនៅតុលាការ ក្រោយប្រកាសក្ស័យធនដោយសារបំណុល។
លោក ជៀប សួរ បានបន្ថែមថា ក្នុងដំណាក់កាល ដែលក្រសួងកំពុងដោះស្រាយជាមួយក្រុមហ៊ុន KrisEnergy គឺមិនទាន់មានក្រុមហ៊ុនថ្មីណា សម្លឹងឃើញការវិនិយោគលើការបូមប្រេងនៅកម្ពុជាឡើយ ខណៈកម្ពុជានៅមានប្លុកប្រេងជាច្រើនទៀត (ទាំងនៅដែនទឹកនិងដែនគោក កម្ពុជាមានប្រេងប្រមាណ២០ប្លុក) ដែលត្រូវបន្តការរុករកនឹងធ្វើអាជីវកម្ម៕
ដោយ៖ មឿន ឌីណា (Moeun Dyna)
