ភ្នំពេញ៖ អគារ Financial building  នៅក្នុង​គម្រោង​អភិវឌ្ឍន៍​ទីក្រុង Olympia City របស់​ក្រុមហ៊ុន OCIC ដែលមានតម្លៃ ៥០លានដុល្លារកំពង់ដំណើរសាងសង់ គ្រោងនឹងបញ្ចប់ នៅឆ្នាំ២០២៤ខាងមុខនេះ។ បើតាមការថ្លែងឱ្យដឹងពី លោក ម៉េង ចំរើន ប្រធាន​គ្រប់គ្រង​នៃ​គម្រោង Olympia City។

អគារ Financial building ដែលមាន​ទីតាំង​ជាប់​របង​ពហុកីឡដ្ឋាន​ជាតិ​អូឡាំពិក​កម្ពុជា ​សាងសង់​ឡើងជា​លក្ខណៈ​អគារ​ប្រើប្រាស់​ចម្រុះ​មានដូចជា ហាង​លក់ទំនិញ ភោជនីយដ្ឋាន និង​មន្ទីរ​សម្រាក​ព្យាបាល​ជាដើម​។ បើតាមការបញ្ជាក់របស់ លោក ម៉េង ចំរើន បានបន្តថា អគារ​នេះ​នឹង​ចែកចេញ​ជា ២៧​ល្វែង ​ដោយ​ល្វែង​នីមួយៗ​មាន​ទទឹង ៨,២ ម៉ែត្រ បណ្តោយ ២៤ម៉ែត្រ និង​មាន​មួយចំនួន​កម្ពស់ ១០ ជាន់ និង​ខ្លះទៀត​កម្ពស់ ៨ជាន់ ចំណែក​នៅក្រោម​ដី ១ ជាន់​ (​លក្ខណៈ​ឯកជន​) និង​ចំនួន ២​ជាន់​ទៀត ​ប្រើប្រាស់​ជា​ចំណត​រួម​។

​លោក បានបន្តទៀតថា តម្រូវការ​ទីផ្សារ​បាន​ជំរុញ​ឱ្យ​ក្រុមហ៊ុន OCIC ធ្វើការ​សាងសង់​អគារ Financial building ឡើង​ ហើយអគារ​នេះ​ នឹងមាន​លក្ខណ​ពិសេស ព្រោះ​វា​ត្រូវ​រចនា​ឡើង​សម្រាប់​ការប្រើប្រាស់​ចម្រុះ។ លោក ថា អគារ​ លក្ខណពិសេស ព្រោះ​គ្រាន់តែ​ការសាងសង់ ក្រុមហ៊ុន​គ្រោង​នឹង​ចំណាយ​ប្រមាណ ៥០​លាន​ដុល្លារ ខណៈ​តម្លៃ​ដី​មិនត្រូវ​បូក​បញ្ចូល​នោះទេ​។

ក្នុង​ការដ្ឋាន​គម្រោង Olympia City ទាំងមូល បច្ចុប្បន្ន​មាន​ក្រុមកម្មករ​ប្រមាណ​ជាង ២០០នាក់​ជា​រៀងរាល់ថ្ងៃ​។ បើតាមការបន្ថែមរបស់ ប្រធានគ្រប់គ្រងនៃគម្រោង Olympia City លោក ម៉េង ចំរើន ថា ចំនួន​នេះ​ទាប​ជាង​មុន​បន្តិច ដោយសារ​ក្រុមហ៊ុន​ចង់​ចូលរួម​ជាមួយ​រដ្ឋាភិបាល​ក្នុង​ការទប់ស្កាត់​ការឆ្លង​រាលដាល​ជំងឺ​កូវីដ​១៩ ដែល​កំពុង​កើនឡើង​ខ្ពស់​នៅក្នុង​ព្រឹត្តិការណ៍​សហគមន៍​ ២០កុម្ភៈ​។

Olympia City គឺជា​គម្រោង​វិនិយោគ​ដ៏ធំ​មួយ​របស់​ក្រុមហ៊ុន OCIC ស្ថិតនៅ​ភាគ​ខាងជើង​នៃ​ពហុកីឡដ្ឋាន​ជាតិ​អូឡាំពិក​លើ​ផ្ទៃដី​ជាង ៧ហិកតា​។ នៅក្នុង​គម្រោង​នេះ​មាន​អគារ​សរុប ១២ ដែល​រួមមាន​អគារ​ខុនដូ ផ្សារ​ទំនើប អគារ​ពាណិជ្ជកម្ម អគារការិយាល័យ និង​សណ្ឋាគារ​ជាដើម​។

ចាប់ផ្តើម​សាងសង់​នៅក្នុង​អំឡុង​ឆ្នាំ​២០១២ បច្ចុប្បន្ន​ មាន​អគារ​ខុនដូ​ចំនួន ៤ អគារ​ការិយាល័យ​ចំនួន ២ សណ្ឋារគារ ចំនួន​ ១ សាលារៀន ចំនួន​ ១ និង​ផ្សារ​ទំនើប​ចំនួន ១ បានបញ្ចប់​ការសាងសង់ និង​បើក​ដំណើរការ​ហើយ​៕

ប្រភព៖ ភ្នំពេញប៉ុស្តិ៍

ដោយ៖ Ma Dynoeun