មណ្ឌលគិរី៖ តំណាងសហគមន៍ចំនួន ១២ ក្នុងដែនជម្រកសត្វព្រៃភ្នំព្រេច ស្រែពក និងកែវសីមា ខេត្តមណ្ឌលគិរី បានចុះកិច្ចព្រមព្រៀងជាផ្លូវការជាមួយ ក្រសួងបរិស្ថាន កាលពីថ្ងៃទី១៩ ខែធ្នូ ឆ្នាំ២០១៩ ក្នុងការទទួលបានសិទ្ធិពេញលេ ញក្នុងការគ្រប់គ្រងធនធានធម្មជាតិប្រកបដោយនិរន្តរភាព។
ការចុះហត្ថលេខាព្រមព្រៀងរវាងសហគមន៍តំបន់ការពារធម្មជាតិ និងក្រសួងបរិស្ថាននេះ គឺដើម្បីផ្តល់សិទ្ធិស្របច្បាប់ពេញលេញទៅឱ្យសហគមន៍តំបន់ការពារធម្មជាតិ ក្នុងការរៀបចំ និងអនុវត្តផែនការគ្រប់គ្រងធនធានធម្មជាតិប្រកបដោយនិរន្តរភាពនៅក្នុងសហគមន៍របស់ខ្លួន ស្របតាមច្បាប់តំបន់ការពារ របស់កម្ពុជា។ បើតាមសេចក្ដីប្រកាសព័ត៌មាន របស់អង្គការមូលនិធិសកលសម្រាប់អភិរក្សធនធានធម្មជាតិ (WWF)។
លោកស្រី ម៉ុម ថានី រដ្ឋលេខាធិការក្រសួងបរិស្ថាន បានលើកឡើងនៅក្នុងពិធីចុះហត្ថលេខាងលើថា សហគមន៍ជាមូលដ្ឋាន គឺជាកម្លាំងចលករមួយ នឹងបានរួមចំណែកក្នុងការគ្រប់គ្រងធនធានធម្មជាតិ ពីព្រោះពលរដ្ឋសហគមន៍មូលដ្ឋាន ជាអ្នករស់នៅ និងនៅក្បែរតំបន់ការពារធម្មជាតិ។ ជាមួយគ្នានេះដែរ ក្រសួងបរិស្ថានគាំទ្រ និងចូលរួមជាមួយសកម្ម ភាពជាមួយស្ថាប័នពាក់ព័ន្ធផ្សេងៗ ក្នុងការរៀបចំ និងអនុវត្តការគ្រប់គ្រងធនធានធម្មជាតិនៅកម្ពុជា។
នាយកអង្គការ WWF កម្ពុជា លោក សេង ទៀក បាននិយាយថា គោលបំណងនៃការបង្កើតសហគមន៍តំបន់ការពារធម្មជាតិ ដើម្បីជួយពង្រឹងនិងបង្កើនប្រសិទ្ធភាពគ្រប់គ្រងធនធានព្រៃឈើ ជីវៈចម្រុះ និងសត្វព្រៃក្នុងតំបន់ការពារ។ លោក ថា ម្យ៉ាងទៀត ដើម្បីទទួលស្គាល់សិទ្ធិ និងតួនាទីស្របច្បាប់ លើការគ្រប់គ្រង ការចាត់ចែង និងប្រើប្រាស់ធនធានរួមរបស់សហគមន៍។ បើតាមសេចក្ដីប្រកាសខាងលើបាន។
សហគមន៍ការពារធម្មជាតិទាំង១២ មានផ្ទៃដី៤៤ពាន់ហិកតា ក្នុងនោះមានសមាជិកសហគមន៍មានជាង ១.២ម៉ឺននាក់។ សម្រាប់សមាជិកខាងលើ ទទួលបានសិទ្ធិស្របច្បាប់ ភាពជាម្ចាស់ និងទំនួលខុសត្រូវ ក្នុងការគ្រប់គ្រងធនធានធម្មជាតិប្រកបដោយនិរន្តរភាពក្នុងសហគមន៍ និងអាចប្រើប្រាស់ធនធានទាំងនេះ ប្រកបដោយចីរភាព។
សមាជិកសហគមន៍ទាំង១២នេះ មានប្រមាណ១៥ពាន់នាក់ ដែលក្នុងនោះមានស្ត្រី៤២ភាគរយ ដែលបានពឹងអាស្រ័យផលអនុផលព្រៃឈើដោយផ្ទាល់។ បើតាមសេចក្ដីប្រកាសដដែល និងបានបន្តថា ខេត្តមណ្ឌលគិរី សម្បូរទៅដោយធនធានព្រៃឈើ និងធនធានជីវចម្រុះដ៏សម្បូរបែបក្នុងនោះមាន ជម្រកសត្វព្រៃយ៉ាងច្រើនដូចជា សត្វទន្សោង ខ្លារខិន ដំរីអាស៊ី ខ្ទីង រមាំង ក្ងោក និងត្រយងយក្សជាដើម៕
ដោយ៖ឌីណា
